NASIONÁL, HEADLINE

Artista Calema hasoru PM Xanana, “Ami sente hanesan iha uma rasik”

Artista Calema hasoru PM Xanana, “Ami sente hanesan iha uma rasik”

Primeiru-Ministru, Kay Rala Xanana Gusmão, hala'o enkontru ho Artista Calema, Antonio Mendes Ferreira no Fradique Mendes Ferreira, iha Palásiu Governu Dili, sesta (17/05). Imajen Tatoli/Francisco Sony

DILI, 17 maiu 2024 (TATOLI)—Duo múziku maun-alin husi São Tomé e Príncipé ho naran Calema hasoru malu ho Primeiru-ministru Kay Rala Xanana Gusmão, iha Palásiu Governu, sesta ne’e.

Durante enkontru ho Primeiru-Ministru, artista maun-alin na’in-rua ne’e amigavel tebes maske foin hala’o vizita ba dahuluk mai Timor-Leste.

“Enkontru ho Primeiru-ministru di’ak tebes no ami kontente loos. Ami espresa ami-nia ksolok hamutuk ho povu Timor-Leste ne’ebé simu ami ho di’ak, nakonu ho domin. Ami agradese tanba ami iha Timor sente hanesan iha ami-nia uma rasik,” António Mendes Ferreira espresa nia sentimentu hafoin hasoru malu ho xefe governu.

Artista São tomense ne’e dehan, dezde sama ain iha illa Timor, observa katak, Timor iha nia beleza ne’ebé furak no bonita no iha buat balun ne’ebé hanesan ho São Tomé e Príncipe, nasaun membru CPLP ida, liu-liu iha temperatura, tasi-ibun ne’ebé furak no ninia emar sira ne’ebé simpátiku no amigavel tebes; situasaun ida-ne’e hanesan buat foun ida ne’ebé interresante tebes.

Artista maun-alin husi nasaun belun Timor-Leste, São Tomé e Principé ne’e, konvida timoroan sira ne’ebé iha uma atu mai haree no asiste konsertu tanba sira sei toka hamutuk ho artista timoroan sira iha feira Tasi-ibun Portu Díli nian iha 19 maiu tinan-ne’e.

Durante estádia iha Timor-Leste, Calema sei aproveita mós loron ida atu halo gravasaun vídeo klipe kona-ba sira-nia futuru múzika atu bele tau no hatudu bá mundu kona-ba Timor-Leste.

Mensajen bá timoroan tomak husu atu luta no fiar-metin ba mehi ne’ebé iha, bainhira hakarak atu sai artista, tenke luta no tenke fiar. Iha luta no fiar mak buat ruma sei akontese duni.

Prezensa artista Calema iha Timor-Leste, tanba hetan konvite husi Even2u atu anima populasaun iha ámbitu selebrasaun loron restaurasaun independénsia Timor-Leste nian bá dala-22.

Koñese Calema

Calema nu’udár duo múziku maun-alin mai hosi São Tomé e Príncipe, ne’ebé agora hela iha Portugál, no forma husi maun António Mendes (5 abríl 1992) no alin Fradique Mendes Ferreira (19 marsu 1987). Naran dupla ne’e refere ba laloran boot, espesialmente iha área tasi-ibun Áfrika nian.

Calema grava ona albún tolu hanesan Bomu Kêlê, lansa iha tinan-2014 ho Gravadora Calema, A nossa vez lansa iha loron 20 fulan-outubru 2017, múzika ne’ebé ema barak liu haree iha Youtube kanta iha Luzofónia, ho gravadora Klasszik no Yellow lansa iha 7 fevereiru 2020.

Jornalista : Felicidade Ximenes

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!