DILI, 27 outobru 2025 (TATOLI) – Asistente bá Matebian José Bernardo, Advogada Privada Adelino Melo de Araújo, hateten, liuhusi Tribunál Judisiál Primera Instánsia deside ona hodi absolve arguidu membru PNTL husi krime sikuestru ne’ebé supeitadu matebian José Bernardo mate iha sela PNTL, Kaikoli husi parte asistente hatama ona rekursu.
“Ami hatama rekursu iha dia 16 Setembru 2025 hafoin ferias judisiária. Hanesan ami hateten katak iha ami-nia rekursu ne’e kontesta desizaun Tribunál Primeira Instánsia nian,” Adelino Melo ba TATOLI iha TJPID, Kaikoli, segunda ne’e.
Nia ladún hakle’an kona-ba saida saida mak konsta iha rekursu ne’e, maibé ein prinsípiu kontestasaun hasoru desizaun Tribunál Primeira Instánsia nia ba kazu José Bernardo nian liga ba prosedimentu jurídika.
Adelino mós haktuir, tuir informasaun ne’ebé iha katak, Ministériu Públiku iha kestaun ne’e Prokuadór Titutár ba kazu ne’e submete ona nia rekursu hodi konstesta desizaun Trubunál Primeiru Instánsia molok ferias judisiária.
Nia dehan, tuir tramitasaun legál ne’e depende ba Tribunál sei notifika Defeza husi arguidu sira-nia hodi fó posizaun sira-nia ba kazu ne’e.
Rekorda fali katak, iha loron (16/7/2025) Tribunál Judisiál Primeira Instánsia Dili liuhisi desizaun juiz deklara absolve arguidu membru PNTL husi krime sikuestru ne’ebé suspetadu ba José Bernardo nia mate iha setembru 2022 tanba faktu la provadu.
Notísia relevante : Tribunál absolve membru PNTL na’in-tolu husi kazu José Bernardo nia mate
Jornalista: Natalino Costa
Editór: Evaristo Soares Martins
