DILI, 28 Abríl 2026 (TATOLI)—Vise Reitór Universidade Nasionál Timor Lorosa’e (UNTL), Câncio Monteiro, informa daudaun ne’e departamentu desportu iha UNTL halo preparasaun téknika atu eleva grau baxarelatu ba grau lisensiatura.
“Estudu viabilidade finaliza ona no agora iha hela espasu atu ajusta kurríkulu tuir padraun nasionál ne’ebé ita hein hela maibé nesesidade nafatin kabe ba kompeténsia departamentu nian atu halo preparasaun téknika. Depoiz halo kolaborasaun ho fakuldade no kuandu iha ona UNTL mak parte hotu sei halo enkontru kle’an, liliu net assesment tanba kuandu eleva hosi baxarelatu ba lisensiatura, ne’e ita konsidera hanesan kursu foun ida, ne’ebé eziste iha UNTL maka tenke rejistu iha ministériu. Ida-ne’e presiza no tenke halo avaliasaun lisensa operasionál,” nia dehan ba TATOLI iha Fundasaun Oriente, Tersa ne’e.
Vise Reitór UNTL dehan departamentu desportu iha UNTL ne’ebé daudaun ne’e sei ho nivel baxarelatu, ne’ebé persiza eleva ba lisensiatura.
“Ida-ne’e ezijénsia merkadu maibé bazeia ba lei edukasaun katak manorin ida kuandu hanorin ensinu sekundáriu nia tenke ho nivel lisensiatura. Tanba ida-ne’e mak sai ezijénsia ba UNTL ne’ebé daudaun ne’e departamentu hala’o hela servisu namanas hela. Daudaun ne’e buka informasaun, justifikasaun fundamentál sira oinsá atu eleva grau baxarelatu ba lisensiatura,” Câncio Monteiro dehan.
Nune’e mós, Vise Diretór Departamentu Edukasaun Fízika no Desportu UNTL, Francisco Barbosa Pereira, hateten MESSK iha ona hanoin atu eleva departamentu desportu husi nivel baxarlatu ba nivel lisensiatura.
“Iha tinan liubá ita la hetan akreditasaun, maibé daudaun ita akredita ona, nune’e Ajénsia Nasionál Avaliasaun, Akreditasaun no Akadémika (ANAAA) rekomenda ba ita atu elava departamentu ne’e husi nivel baxarlatu ba lisensiatura,” nia dehan.
Daudaun ne’e, nia parte mós simu ona informasaun husi parte Ministériu Ensinu Superiór, Siénsia no Kultura (MESSK) atu eleve departamentu Desportu husi nivel baxarlatu ba lisensiatura.
“Ida-ne’e ita atu responde ba nesesidade iha baze liuliu responde ba matéria desportu iha ensinu sekundáriu jerál tuir Dekretu-Lei Ministériu Edukasaun,” nia dehan.
Dirijente ne’e akresenta rekomendasaun sira-ne’ebe mai simu husi ANAAA mak dahuluk rekursu umanu, fasilidade no seluk tan.
“Maibé iha Departamentu Desportu, rekursu umanu ita prenxe ona rekizitu tanba maioria mestradu hotu, ba fasilidade ita halo kooperasaun ho Ministériu Juventude, Desportu, Arte no Kultura (MJDAK), nune’e ita utiliza sira-nia fasilidade atubele prenxe rekizitu sira hotu husi ANAAA,” nia dehan.
Entretantu, Departamentu Desportu harii husi Governu Dahaat, ne’ebé lidera hosi Sekretáriu Estadu Juventude no Desportu, Miguel Marques Manetelu no antigu Reitór UNTL, Benjamin de Araújo Corte-Real nia tempu, iha 10 Janeiru 2010.
Departamentu Desportu prodús ona graduadu 289 no nia estudante ativa hamutuk na’in-160, dosente permanente na’in-lima (5) no parte tempu na’in-ida (1), dosente internasionál na’in-neen (6), na’in-haat hosi Kuba no na’in-rua hosi Portugál.
Jornalista: Osória Marques
Editór: Xisto Freitas da Piedade
