DILI, 11 marsu 2024 (TATOLI) – Diresaun-Jerál Floresta, Kafé no Planta Industriál husi Ministériu Agrikultura, Pekuária, Peska no Floresta rekolla ona reseita rihun $26-resin ba kofre Estadu durante janeiru no fevereiru.
“Reseita ne’e foin fulan rua nian, ita sei hein tan fulan-marsu depois maka ita hatama dala ida ba kofre Estadu liuhusi Banku Nasionál Ultramarinu [BNU]”, Diretór-Jerál Floresta, Kafé no Planta Industriál, Raimundo Mau, hatete.
Reseita sira ne’e parte Floresta halibur ne’e mai husi atividade ba lisensa operasionál kona-ba tesi no fa’an ai, inklui atividade ne’ebé komunidade sira halo, maibé laiha autorizasaun.
“Bainhira populasaun hakarak tesi ai ruma atu lori bá fa’an, tenke prienxe formuláriu iha Diresaun Floresta, nune’e sira bele hetan karta lisensa. Maibé, sira-nian karta lisensa ne’e vale ba loron ida de’it. Depois ai ne’ebé atu tesi tenke tuir duni karta lisensa, labele tesi fali ai ne’ebé bandu ona hanesan ai-bubur no ai-ru. Kuandu sira la tuir karta lisensa no kontra fali regra ne’ebé iha sei hetan sansaun husi Diresaun Floresta. Tanba ne’e, iha fulan rua nia laran iha ona abitante hamutuk 52 mak selu multa, tanba la kumpre karta lisensa no balun laiha lisensa”, esplika.
Bazeia ba dadus infrasaun ne’ebé komunidade komete, diresaun sei fó sai iha finál marsu, nune’e bele hatene infratór sira kontra regra ne’e iha parte saida no tipu ai ne’ebé sira tesi ho ninia kuantidade, depois mak selu iha banku.
“Servisu Floresta nian kontinua halo vijilánsia hodi kontrola nafatin komunidade sira atu labele halo atividade tesi ai tuir sira-nian hakarak no labele kontra regra sira Floresta nian”, dehan.
Rekorde katak Diresaun Floresta rekolla, entre janeiru no dezembru 2023, reseita hamutuk $149.753,42. Reseita ne’e mai husi produtu hanesan atendimentu lisensa, tula ai-teka metan no mutin, lisensa tula ai-sunu no ai-sunu ne’ebé guarda florestál halo apreensaun, inklui mai hsi lisensa esportasaun kulak (nehek-teen) bá Indonézia.
Totál reseita akumuladu husi janeiru $11.44,50, fevereiru $6.769, marsu $17.093,79, abríl $9.997,53, maiu $12.898,70, jullu $12.252,20, agostu $15.264,40, setembru $12.473,60, outubru $14.421,65, novembru $12.808,75 no dezembru $10.044,75.
Notísia relevante: Falta rekursu atu hala’o serbisu ba protesaun no konservasaun florestál
Jornalista: Tomé Amado
Editora: Maria Auxiliadora
