DILI, 28 fevereiru 2024 (TATOLI) – Falta rekursu umanu atu hala’o serbisu ho adekuadu hodi halo protesaun no konservasaun iha área floresta ne’ebé luan tebes, maka Sekretáriu Estadu Floresta, Fernandinho Vieira, hakarak rezolve kestaun ne’e iha fulan-marsu.
Governante dehan katak, durante ne’e, serbisu floresta kontinua la’o hela, maibe ladún efetivu tanba funsionáriu permanente guarda florestál iha de’it 300 no kazuál 238 labele kotinua sira-nian serbisu, tanba kontratu remata.
“Falta rekursu umanu ne’e kuaze iha ministériu hotu. Agora, iha ita-nian diresaun rasik iha área floresta mak menus mós rekursu, maibe ha’u promete katak problema funsionáriu kazuál guarda florestá sira-nian tenke rezolve iha marsu, nune’e bele aselera fali efetividade serbisu hodi tau-matan ba floresta sira”, dehan sekretáriu Estadu hatete iha Paraia dos Coqueiros.
Tuir Fernandinho Vieira, guarda florestál sira ne’e la’ós atu koloka de’it iha kapitál no munisípiu sira, maibé sei destaka mós iha suku sira ne’ebé sai alvu ba potánsia floresta nian.
Prezidente Autoridade munisípiu Aileu, João Bosco dos Santos, lamenta katak pesoál guarda florestál ne’ebé destaka iha Aileu ladún serbisu ho efetivu. Komunidade sira tesi ai protejida hanesan ai-bubur no ai-ruu, maibé laiha intevensaun husi guarda florestál sira.
Tanba ne’e, nia sujere ba Ministériu Agrikultura, Pekuária, Peska no Floresta, liuhusi Sekretaria Estadu Floresta atu koloka guarda florestál iha munisípiu refere ne’e tenke apoia ho ekipamentu ne’ebé adekuadu, nune’e sira bele serbisu ho responsabilidade.
“Tenke apoia ho ekipamentu hanesan mapa, tenda, hahán no saláriu di’ak atu sira bele serbisu ho reponsabilidade. Korpu guarda florestál nia fatin iha ai-laran. Kuandu hakarak ka’er komunidade ne’ebé tesi ai ilegál, maibé sira maka toba fali iha vila ne’e difísil atu ka’er ema”, afirma.
Tuir dadus, totál área terrestre Timor-Leste nian iha ektare millaun 1.493, ne’ebé 59% ka ektare rihun 869 ho kobertura florestál iha 2012.
Husi totál área floresta ne’e, estudu husi programa prezervasaun florestál husi Ministériu Agrikultura no Ajénsia Kooperasaun Internasionál Japaun (JICA) hatudu katak Timor-Leste lakon kada tinan floresta entre rihun 10 to’o 12.
Notisia relevante: SEF hakarak buka dalan asegura kontratadu guarda florestál
Jornalista: Tomé Amado
Editora: Maria Auxiliadora
