DILI, 17 juñu 2023 (TATOLI)—Embaixada Koreia iha Timor-Leste ho kooperasaun hosi Ferderasaun Taekwondo Timor-Leste (FTTL), sábadu ne’e, realiza Kompetisaun Taekwondo ka Korean Ambassador’s Taekwondo Cup 2023 ba dala-10 iha Timor-Leste.
Embaixadór Koreia iha Timor-Leste Shin, Mantek, hateten, inisiativa ne’e atu dezenvolve Taekwondo iha Timor-Leste no Embaixada ho kompromisu kontinua apoia dezenvolve desportu ne’e di’ak liután.
“Ohin loron importante ida tanba ita bele realiza eventu kompetisaun Taekwondo ba dala-10 nian. Koreia hanesan nasaun ne’ebé mak orijen Taekwondo nian, ba ami hanesan Embaixada Koreia, kompremetidu hakarak apoia Timor-Leste promove Taekondo nu’udar desportu ida atu fó oportunidade ba joven timor-oan ba vida ne’ebé saudável,” Embaixadór Koreia hato’o iha nia intervesaun, durante abertura Korean Ambassador’s Taekwondo Cup 2023, iha Ginájiu Dili, sábadu ne’e.
Notísia relevante : Atleta Taekwondo nain-haat selesiona ba SEA Games Kamboja
Nune’e, Diplomata ne’e husu ba joven sira bainhira tuir Taekwondo tenke hatudu desiplina, respeita no tane a’as valór umanu hodi nune’e kontinua habelar no hametin kooperasaun iha sosiedade.
Iha biban hanesan, Prezidente FTTL, Gabriel da Costa, agradese ba Embaixada Koreia tanba bele halo kooperasaun hodi realiza kompetisaun ne’e.
“Ita tenke fó obrigadu barak ba Embaixada Koreia iha Timor-Leste tanba bele organiza eventu ida-ne’e, iha buat rua importante iha ne’e, ida eduka ita atu sai moris saudável no atu eduka ita-nia mentál ne’ebé di’ak atu kontribui ba dezenvolvimentu Timor-Leste liuhosi área ne’ebé ita kontribui ba desportu nian,” nia dehan.
Prezidente Federasaun husu ba atleta sira atu kontinua tuir eventu saida de’it maka organiza hosi Embaixada no Federasaun ho obrigatóriu kontinua prepara-an tuir kompetisaun sira.
“Ba alin sira ne’ebé partisipa iha eventu ne’e, aproveita imi-nia tempu hodi hatudu imi-nia talentu ne’ebé imi apreende hamutuk ho treinadór sira hodi imi sai duni atleta ne’ebé disiplina iha sosiadade Timor-Leste. Ita tenke iha mentál, fíziku no saúde di’ak atu kontribui ba dezenvolvimentu nasionál,” Gabriel da Costa enkoraja.
Nune’e mós, Prezidente Konfederasaun Desportu Timor-Leste (CDTL, sigla portugés), Macário Floriano Sanches, agradese ba Embaixada Koreia tanba bele organiza eventu desportiva ne’e.
“Taekwondo nu’udar desportu ida atu eduka ema hasa’e moris saudável, atu eduka ema iha mentalidade di’ak hodi kontribui ba dezenvolvimentu. Tanba ne’e, ba alin sira, manán ka lakon ne’e prosesu ida maibé presiza kontribui no respeitu juri no árbitu sira tanba ita-nia kualidade ne’e hahú hosi respeitu ema ,” nia hameno.
Korean Ambassador’s Taekwondo Cup 2023 ba dala-10 iha Timor-Leste hahú iha sábadu ne’e no sei kontinua to’o domingu, partisipa hosi atleta Taekwondo na’in-65 hosi Dozan oin-oin, hosi munisípiu Dili, Baucau, Manatuto, Bobonaro no Aileu.
Jornalista : Natalino Costa
Editora : Julia Chatarina
