MALIANA, 29 marsu 2023 (TATOLI) – Estrada fatin tolu iha aldeia Ai-Assa, suku Leo-Hitu, postu administrativu Balibo, munisípiu Bobonaro, kotu hafoin akontese udan-boot iha fulan-janeiru no fevereiru tinan ne’e, difikulta movimentasaun transporte públiku no privada.
Xefe suku Leo-Hitu, Benjamin Maia, konfirma kondisaun estrada ne’e grave iha fatin tolu hosi aldeia Rai-ulun, maibé grave liu ne’e iha aldeia Ai-Assa liga ba aldeia haat sira seluk.
Notísia relevante: Programa Naroman ba Suku iha Leohitu ladún funsiona ho di’ak
“Estrada fatin tolu iha Ai-Assa ne’e monu totalmente, motorizada mós labele halo movimentu ba-mai, entaun difikulta ita-nia komunidade atu halo movimentu hosi Leo-Hitu ba Maliana, impede atu lori produtu lokál ba merkadu,” nia informa ba jornalista Tatoli, iha edifísiu Administrasaun Munisípiu Bobonaro, kuarta ne’e.
Ho kondisaun estrada ne’e, Xefe suku Benjamin hato’o ona ba autoridade postu no Prezidente Autoridade Munisípiu Bobonaro, hafoin hetan estragu, maibé to’o agora seidauk hetan resposta ruma.
Nia husu ba Ministériu Obra Públika atu orienta Institutu Jestaun Ekipamentu Apoiu Dezenvolvimentu Infraestrutura, Institutu Públiku (EGEADI,I.P) halo normalizasaun lalais molok loron eleisaun.
“Normaliza tiha nune’e ita-nia komunidade bele halo movimentu ba-mai, agora ita besik tama ona ba eleisaun, iha suku Leo-Hitu sentru votasaun haat, agora estrada ida aat iha aldeia Ai-Assa ne’e mós iha sentru votasaun ida, entaun molok ita atu realiza eleisaun parlamentár entaun ne’e mós impaktu boot, ida atu lori materiál eleisaun urna sira atu lori ba hatún iha sentru votasaun,” nia katak.
Kondisaun estrada ne’e mós difikulta kompañia fornesedór sira mobiliza materiál fabrikadu no lokál bá suku Leo-Hitu hodi konstrui Uma Naroman ba Povu (UNP) faze daruak tinan 2022.
Enkuantu tuir dadus Suku Leo-Hitu iha aldeia lima ho totál populasaun hamutuk 4.152 ho totál xefe família 991.
Notísia relevante: PM Taur kolleta ikan Nila-Tilapia tonelada ualu iha Leohitu
Jornálista : Sérgio da Cruz
Editór : Evaristo Soares Martins
