DILI, 22 Juñu 2026 (TATOLI) – Sekretáriu Estadu Asuntu Veteranu, César dos Santos da Silva “Merak” fó-sai katak família no Governu deside haloot saudozu antigu Prezidente-Repúblika Francisco Guterres Lú Olo iha loron sesta feira, 26 Juñu iha jardín erói Metinaru, Dili.
“Tuir sekuénsia katak kadavér saudozu atingu Prezidente Repúblika Francisco Guterres Lú Olo sei to’o iha aeroportu iha tuku 6h00 dadeer no sei simu ho onra parada militár. Hafoin ida-ne’e ba serimónia fúnebre iha loron Sesta Feira, Juñu 2026 iha Jardín Erói Pátria iha Metinaru,” Sekretáriu Estadu Asuntu Veteranu ne’e ko’alia iha Farol, Dili, segunda ne’e.
Merak dehan, desizaun haloot iha jardín eroi Metinaru sei deside liuhusi dekretu prezidensiál.
Prezidente Komisaun ne’e, husu mós ba populasaun no funsionáriu tomak iha instituisaun Estadu atu hamutuk hodi simu kadavér saudozu nian iha aeroportu Internasionál Prezidente Nicolau Lobato-Dili.
Lider Nasionál, nu’udar mós Prezidente Partidu FRETILIN, Francisco Guterres “Lú-Olo”, Domingu ne’e, hakotu iis iha Ospitál Prince Court, Kuala Lumpur, Malázia, hafoin halo tratamentu saúde intensivu.
Tuir observasaun Ajénsia TATOLI kalan ne’e iha rezidénsia Saudozu Lú Olo iha Farol, Dili, instituisaun estadu, veteranu, juventude rezisténsia kontinua presta omenajen ikus.
Nune’e mós parte família no Governu hahú halo preparasaun atu simu saudozu nia kadavér iha loron-tersa.
Nune’e mós resintu Farol, Dili hetan seguransa másimu husi membru Polísia Nasionál Timor-Leste no Komandu F-FDTL.
Carro Funerario husi Komandu FALINTIL-Forsa Defeza Timor-Leste, destaka ona iha rezidénsia saudozu nian iha Farol, Dili.
Jornalista: Florencio Ximenes
Editór: Evaristo Soares Martins
