DILI, 15 Jullu 2026 (TATOLI) – Federasaun Kooperativa Kréditu Hanai (FCHM, sigla portugés) husu ba Tatoli atu reforsa rekursu umanu hodi halo kobertura to’o iha área rurál.
Sujestaun ne’e hato’o husi Jerente Jenerál Federasaun Kooperativa Kréditu Hanai Malu, Elizário Ferreira, iha ámbitu selebrasaun aniversáriu Tatoli ba da-X, hahú husi 27 Jullu 2016 to’o 27 Jullu 2026, no saúda Tatoli nia serbisu ne’ebé nafatin fó informasaun ba públiku.
“Ami-nia rekomendasaun mak presiza aumenta tan rekursu umanu, nune’e informasaun labele iha nasionál de’it, maibé mós to’o área rurál. Nune’e, territóriu tomak bele atualiza ho informasaun ne’ebé Tatoli hato’o ba públiku”, Elizário Ferreira hateten ba Tatoli, ohin.
Nia dehan Tatoli presiza reforsa rekursu umanu to’o iha baze, tanba dalaruma atividade sira ne’ebé hala’o iha área rurál Tatoli nia prezensa seidauk iha.
Nia observa katak durante akompaña notisía sira ne’ebé públika iha Tatoli, di’ak tebes ba públiku, tanba atualizada no la repete informasaun sira.
“Ami haree katak Tatoli hatudu profisaun hanesan instituisaun ida ne’ebé profesionál. Ami hanesan setór kooperativu fó parabéns ba Tatoli ne’ebé sempre fó informasaun ne’ebé di’ak”, nia hato’o.
Maibé nia sujere atu Tatoli tenke halo nia kobertura to’o iha área rurál, liuliu haree ba problema sosiál sira ne’ebé povu hasoru iha baze.
Nia subliña katak Tatoli nu’udar mídia Estadu nian tenke kontinua dezenvolve an, nune’e bele hato’o informasaun ne’ebé kredivel ba povu tomak. “Ha’u lori Federasaun Kooperativa Kréditu Hanai Malu nian parabeniza Tatoli no kontinua serbisu ba oin”, nia dehan.
Notísia relevante: Prezidente Ramos-Horta husu TATOLI kontinua fahe informasaun no hametin unidade iha rai-laran
Jornalista: Arminda Fonseca
Editora: Maria Auxiliadora
