OEKUSI, 21 Marsu 2025 (TATOLI) – Organizasaun Naun Governamentál (ONG) Haburas Dezenvolvimentu Talentu (HADEZTA), sesta ne’e, abertura kursu lia-koreanu, inglés no komputadór ba joven na’in-60 iha sentru paralelu ne’ebé lokaliza iha suku Costa, sub-rejiaun Pante Makasar, Rejiaun Administrativa Espesiál Oekusi Ambeno (RAEOA).
Iha abertura ne’e, Diretór HADEZTA, Francisco de Araujo, hateten intensaun loke formasaun ne’e ba joven sira atu kapasitaan hodi prepara kompete ba kampu traballu iha futuru.
Notísia relevante:PA RAEOA no ONG sira selebra akordu subvensaun públika rihun $351
“Ita hakarak joven sira tenke ko’alia no mós bele hatene prátika, ida-ne’e mak lori opurtunidade hodi kompete iha kampu traballu tanba kada tinan Governu loke oportunidade timoroan ba servisu iha Koreia no Austrália, entaun lian mak sai ponte atu lori ita bá hetan servisu ida iha rai seluk,” nia dehan iha ámbitu abertura formasaun ne’e.
HADESTA kompromete esforsa atu formandu sira sai kualifika didi’ak iha lia-koreanu, Inglés no komputadór tanba formasaun ne’e fazeadamentu hahú ho báziku, tuir tan fulan tolu kontinua tan ba faze ikus intermediariu fulan tolu, nune’e formasaun ne’e sei kompleta iha fulan sia tenke ho kualidade mak foin simu sertifikadu.
Molok ne’e, HADESTA konsentra de’it iha kapitál Dili maibé tinan ne’e alarga tan iha Oekusi iha suku Costa, nune’e bele akumula joven sira iha vila laran tanba barak mak hala’o kursu iha Dili presiza gastu barak.
Iha biban ne’e, Diretór SEFOPE, Mario Muni Salu, agradese ba ONG HADEZTA tanba loke formasaun iha área rurál tanba durante ne’e joven barak sempre buka formasaun iha Dili ho situsaun defisil tebes.
“Liuhusi buat tolu mak bele kompete iha kampu traballu tantu rai laran no rai li’ur, maibé save mak ne’e tenke hatene lian hirak ne’e. Nune’e husu ba formandu sira atu uza didi’ak oportunidade hodi aprende,” nia fó hanoin.
Formasaun ne’e hahú iha loron segunda 24 Marsu 2025, husi segunda to’o sesta ho klase haat, mak hanesan klase dadersan, klase meiudia, klase lokoraik no klase kalan ba funsionáriu sira.
Notísia relevante:SEFOPE atualiza Planu Estratéjiku Nasionál Empregu Timor-Leste 2017-2030
Jornalista: Abílio Elo Nini
Editór: Florencio Miranda Ximenes
