DILI, 06 Marsu 2025 (TATOLI)—Sekretaria Estadu Formasaun Profisionál no Empregu (SEFOPE) liuhusi Sekretariadu Estratéjia Nasionál Empregu, kinta ne’e, hala’o semináriu nasionál kona-ba atualizasaun implementasaun no monitorizasaun husi Planu Estratéjiku Nasionál Empregu Timor-Leste (2017-2030).
“Presiza halo mudansa no revizaun ba Planu Estratéjiku Nasionál Empregu tanba situasaun tinan ida bá tinan seluk lahanesan, entaun ita presiza adapta filafali ho sitausaun atuál sira-ne’ebé mak ita iha,” Sekretáriu Estadu Formasaun Profisionál no Empregu (SEFOPE), Rogério de Araújo Mendonça dehan ba jornalista sira, iha Novo Turismo, Dili.
Nia dehan, dalabarak públiku kestiona Governu katak tanbasá Governu prepara de’it kondisaun traballu ba joven sira sai bá iha li’ur, más la kria kondisaun traballu ne’ebé mak iha Timor-Leste, entaun, husi meiu ne’ebé mak hamutuk iha fatin ida-ne’e hodi halo filafali revizaun ba Planu Estratéjiku Nasionál Empregu.
Tuir nia katak dezafiu ne’ebé boot mak dezempregu, maibé TL hatene katak iha traballadór sira ne’ebé bá rai-li’ur ne’e fó ekonomia ba nasaun.
Iha fatin hanesan, Diretora Ezekutivu International Labour Organization (ILO), Simirin Singh, hateten husi semináriu ne’e atubele hamosu Planu Estratéjiku Nasionál Empregu ne’ebé mak realístiku duni hodi responde ba realidade atuál Timor-Leste nian.
“Ita espera katak planu no estratéjia ida-ne’e la’ós sai dokumentu ida, maibé sai matadalan ida atu guia estratéjia ne’e bá-oin ho di’ak,” nia esplika.
Partisipa iha semináriu ne’e mak hanesan liña ministeriál, parseiru dezenvolvimentu sira hanesan ILO, CCI-TL no Sindikatu Traballadór ho sira seluk tan.
Jornalista: Felicidade Ximenes
Editór: Xisto Freitas da Piedade
