DILI, 05 Juñu 2025 (TATOLI) – Komunidade izlámika selebra, iha aban, Loron Idul Adha 1446 Hijriah, ne’ebé koñesidu mós hanesan Festa Boot ka Festa Sakrifísiu (karan) nian.
Loron ne’e nu’udar solenidade ida ne’ebé importante tebtebes iha relijiaun musulmana, ne’ebé fó hanoin fali karan Abraão nian, ne’ebé hala’o hafoin peregrinasaun ba Meka.
Ba komemorasaun data ne’e, Prezidente Parlamentu Nasionál (PPN), Maria Fernanda Lay, felisita komunidade musulmana hotu, liuliu iha Timor-Leste.
“Ha’u espera katak ita iha ne’e laiha diskriminasaun ba relijiaun, ita respeita malu”, PPN hato’o ohin.
Nia mós husu ema hotu atu valoriza kada relijiaun no nia espera iha futuru ho relijiaun ne’ebé mosu hotu-hotu respeita malu nafatin no respeita ema seluk nia direitu.
Jornalista: Nelson de Sousa
Editora: Maria Auxiliadora
