DILI, 04 outubru 2024 (TATOLI)—Ekipa delegasaun husi International Monetary Fund (IMF) halo ona konsultasaun anuál hodi halo evaluasaun ba kondisaun ekonómika no finanseira Timor-Leste ba tinan 2024.
Ekipa delegasaun ne’e lidera husi Vise-Xefe Divizaun iha Departamentu Ázia no Pasífiku husi IMF, Xefe Misaun Timor-Leste no Vise-Xefe Misaun Japaun, Yan Carriere-Swallow.
“Ita-nia ekipa iha Dili durante semana rua, hasoru malu ho Governu, setór privadu no grupu sosiedade sivíl balun hodi diskute kona-ba Timor-Leste nia prospetiva ekonómika no dezafiu polítika sira ne’ebé nasaun ne’e hasoru,” Yan Carrie-Swallow hafoin hasoru Primeiru-Ministru, Kay Rala Xanana Gusmão, iha Palásiu Governu, sesta ne’e.
Notísia relevante : IMF konklui rekomendasaun prinsipál tolu kona-ba polítika fiskál Timor-Leste
Enkontru ho Xefe Governu ne’e hodi rona diretamente kona-ba Governu nia estratejia hodi hatan ba dezafiu ne’ebé Timor-Leste hasoru iha tinan 2024.
“Ami onrady bele hasoru malu ho Primeiru-Ministru hodi diskute ami-nia hanoin no estratejia Governu nian kona-ba oinsá atu hasoru dezafiu sira ne’ebé Timor-Leste hasoru. Iha loron hirak oin mai ami sei mai iha ne’e no ami sei fó sai komunikadu imprensa iha tersa-feira oin mai ho rezultadu inisiál sira husi ami-nia misaun,” nia tenik.
Konsulta finál ne’e hala’o iha loron 21 fevereiru 2024, ne’ebé durante ne’e IMF halibur informasaun kona-ba dezenvolvimentu ekonómiku no polítika husi autoridade lokál sira.
Iha relatóriu ida uluk nian, IMF deskobre katak Timor-Leste hetan ona kresimentu ekonómiku oin-oin iha tinan ikus ne’e. Timor-Leste rasik sai membru IMF iha loron 23 jullu 2002.
IMF hato’o rekomendasaun lubuk ida ba Governu Timor-Leste atu hadi’a kresimentu no sustentabilidade fiskál inklui nesesidade ba konsolidasaun fiskál graduál hodi halo jestaun ba Fundu Petrolíferu ne’ebé menus ba bebeik no asegura sustentabilidade fiskál ba tempu naruk.
Aleinde ne’e, IMF enkoraja dezenvolvimentu setór privadu liuhusi reforma estruturál sira ne’ebé bele hasai obstákulu sira iha setór agrikultura no turizmu no enkoraja dijitalizasaun. IMF mós envolve iha projetu dezenvolvimentu kapasidade hodi tulun Governu
Jornalista : Osória Marques
Editora : Julia Chatarina
