BOBONARU, 25 Novembru 2025 (TATOLI) – Institutu Nasionál Defeza Direitu ba Labarik (INDDICA sigla portugés), ministeriu relevante no Autoridade Munisípiu Bobonaru hala’o vizita bá Ospitál Referénsia Maliana (HRM, sigla portugés) hodi fahe pakote ai-han nutritivu no materiál eskolár ba labarik sira ne’ebé halo hela tratamentu iha sala pediatria no bebé sira iha sala maternidade.
Prezidente INDDICA, Dinorah Granadeiro, esplika katak vizita ne’e atu solidariza labarik no família sira oinsá bele hetan tratamentu iha Ospitál Maliana ho dignu.
Notisía relevante: Loron Mundiál ba Labarik: INDDICA apela inan-aman garante asesu edukasaun ba labarik
“Ita halo vizita ba ki’ik-oan sira ne’ebé moras hela, inan sira ne’ebé foin partu. Vizita ida-ne’e la’ós hakarak atu hatudu de’it buat ruma. Ita hatudu ita-nia solidariedade ba labarik sira, enkoraja sira atu sente katak maski sira iha hela situasaun difísil, maibé sira la mesak”, nia informa ba Tatoli.
Prezidente ne’e haklaken katak vizita ida-ne’e halo iha ámbitu selebrasaun Loron Mundiál Labarik nian, ne’ebé tinan ne’e realiza iha Bobonaru ho atividade diálogu, desportiva, animasaun oioin atu sira bele sente loron espesiál ne’e.
“Ita selebra iha munisípiu, ita hakarak labarik sira mós hatene no sente katak iha Estadu Timor-Leste ne’e koñese no valoriza sira-nia prezensa iha situasaun ida-ne’e”, nia salienta.
Família pasiente Raquela Bragança konsidera vizita ne’e iha valór boot tebes. “Ami la haree sasán ne’ebé sira lori mai ne’e, maibé presiza mak presenza ne’e importante loos mai ami. Sira mai fó hanoin di’ak, fó korajen mai ami atu forsa nafatin hasoru situasaun saida de’it. Ida-ne’e ami sente la mesak, ita-nia Estadu mós hamutuk ho ami”, nia hato’o.
Tuir ajenda, komemorasaun Loron Mundiál Labarik ne’e sei realiza iha Jináziu Maliana, iha 26 Novembru. INDDICA mós sei realiza diálogu hodi fó oportunidade ba labarik sira atu hato’o sira-nia hanoin, hakarak no problema iha moris loroloron, iha eskola, nune’e bele hatutan mensajen hirak ne’e ba ukun-na’in sira atu hadi’a lejizlasaun balu hodi responde ba labarik sira-nia situasaun.
Notisía relevante: INDDICA prepara $15.000 fasilita família labarik ne’ebé fa’an sasán iha dalan públiku
Jornalista: Sergio da Cruz
Editora: Maria Auxiliadora
