DILI, 11 outubru 2021 (TATOLI)—Komisaun Anti Korrupsaun (CAC, sigla portugés), liuhosi Diresaun Prevensaun no Sensibilizasaun, simu ona lista funsionáriu no kargu xefia hosi instituisaun estadu hamutuk 100, atu deklara riku-soin no bens interese iha 2022.
“Iha fulan setembru, CAC simu lista hosi institusaun Estadu hamutuk 100 ho deklarante ema na’in 5.774 maka sei sujeita ba deklarasaun bens no interese hahú iha janeiru 2022,” Adjuntu Komisáriu CAC ba Asuntu Prevensaun no Sensibilizasaun, Luis Oliveira Sampaio, informa Luis Oliveira Sampaio, ba Agência TATOLI, iha knaar fatin, segunda ne’e.
Lei númeru 7/2020, 26 agostu kona-ba Medida Prevensaun no kombate Korrupsaun (MPKK), tama ona iha vigór, iha 22 fevereiru 2021.
CAC observa iha prosesu arrolamentu instituisaun Estadu sira iha interese atu deklara riku-soin tuir lei MPKK iha kapitulu II Regime de Declaração de Rendimentos, Bens e Interesses hosi artigu 27 to’o 58.
Nune’e, Lei MPKK define ona iha artigu 48 to’o artigu 53, katak ema ne’ebé simu ona pose tuir lei atu assume kargu xefia ruma iha obrigasaun deklara riku-soin dentru loron 30 nia-laran, liu ida ne’e hetan sansaun ho koema 25% to’o 30%.
“Ha’u fiar katak sira sei kolabora tanba la kolabora sei iha konsekuénsia no pena ho modalidade selu koema 25% to’o 30% hosi sira nian saláriu báziku no mensal, dependende ba kualidade infrasaun ne’ebé komete,” Adjuntu Komisáriu ne’e fiar.
TIC Timor sei estabelese plataforma
Adjuntu Komisaun CAC ne’e informa planeia halo koordenasaun ho Agência Teknolojia Informasaun no Komunikasaun, Institutu Públiku (TIC-Timor, I.P) hodi estabelese sistema plataforma online ba deklarasaun rendimentu bens no interese.
“Aban, ami sei halo enkontru ho TIC-Timor atu estabelese sistema plataforma ba formatu deklarasaun redimentu bens no interese,” nia akresenta.
CAC mós halo hela koordenasaun ho Tribunál Rekursu atu armoniza konseitu deklarasaun riku-soin hosi kargu xefia sira liuhosi Sistema Plataforma.
Notísia Relevante: Deklara riku-soin, CAC husu partisipasaun ministériu hotu-hotu
Jornalista: Natalino Costa
Editór : Florencio Miranda Ximenes
