DILI, 02 Jullu 2025 (TATOLI)—Veteranu husi Kaixa Klandistina Betumori iha Aldeia Bahamori, Suku Gariuai, Postu Administrativu Baukau Vila, deside rekolla bandeira nasionál Timor-Leste ne’ebé sira haloot iha rai-ko’ak durante okupasaun Indonézia.
Bandeira nasionál referida hamutuk 150, aseguradu iha rai-ko’ak laran ho objetivu atu utiliza simu prezensa membru Asembleia Parlamentu Nasionál husi Portugál iha tinan-1990.
“Ami rekolla tanba ida-ne’e ami-nia dokumentu iha tempu rezisténsia laran. Ami tau hamutuk iha-ne’e no sei konvida maluk sira uluk serbisu hamutuk hodi deside. Karik Estadu prepara fatin ba sasán hirak-ne’e, ami prontu atu koopera,” Responsavel Kaixa Klandistina Betumori, Domingos Boavida ‘Ulet’ hateten iha Bahamori, kuarta ne’e.
Ulet salienta, desizaun ke’e sai bandeira nasionál husi rai-ko’ak ho objetivu atu prezerva no asegura iha Muzeu Rezisténsia nune’e bele arkiva nu’udár istória ba jerasaun kontinuadora relasiona ho luta ukun rasik-aan ne’ebé kontribui husi komunidade iha Suku Gariuai.
Iha fatin hanesan, Prezidente Konsellu Munisipál Kombatentes Libertasaun Nasionál Baukau (CMCLN-sigla portugeza), Fernando Gusmão ‘Beredu’u’ hateten bandeira nasionál hirak-ne’e subar iha rai-laran tanba bainhira detetadu husi forsa militár Indonézia sei ameasa ba lutadór sira-nia vida.
“Iha funu laran mak bandeira rai iha uma no kuandu deskobre husi militár Indonézia, bele perigu ba vida. Ida-ne’e mak sira subar no agora mak foin ke’e sai,” Beredu’u argumenta.
Beredu’u rekoñese kontribuisaun Gariuai-oan ba luta liuhusi ezisténsia Kaixa Klandistina Betumori ne’ebé kontribui ba prosesu luta to’o Timor-Leste hetan independénsia iha tinan 1999.
Entretantu, bandeira nasionál 150 atualmente aseguradu hela iha Responsavel Kaixa Betumori, Domingos Boavida “Ulet” nia rezidénsia antes entrega ba Arkivu Muzeu Rezisténsia Timor-Leste (AMRT).
Jornalista: Natalino Belo
Editór: Xisto Freitas da Piedade
