DILI, 30 agostu 2024 (TATOLI)— Fundadór Fundasaun Alola no Eis Primeira-Dama, Kirsty Sword Gusmão iha selebrasaun aniversáriu referendu ba dala-25 hateten, maske Timor-Leste hetan ona independénsia maibé lori dezafiu foun ba líder sira hodi liberta ema sira husi gerillu ki’ak nian ba moris di’ak.
“Ha’u kontente tebes hanoin hikas katak tinan 25 liubá ha’u nafatin hamutuk ho Maun Bo’ot. Liutiha tinan 25, maske iha dezafiu barak ne’ebé ita hasoru, esperansa ida-ne’e la lakon, maske ita haree katak sei iha ema ki’ak barak ema, problema barak iha kampu oin-oin, ita nia sosiedade seidauk lakon esperansa,” Kirsty Sword hateten hafoin tuir aniversariu referendum ba dala 25 iha Estádiu Munisipál Dili, sesta kalan.
Nia fiar katak jerasaun pasadu sira ne’ebé luta maka’as ba ukun rasik-an mós sente agradese ba luta ne’ebá tanba maski sira iha problema barak maibé ema la moris iha tauk nia laran.
“Ha’u lembra fila fali bainhira ha’u mai iha Timor iha tinan 1990 ema hotu moris iha tauk nia laran, tauk atu lakon, ema oho, hetan ameasa no ohin loron tauk ne’e lakon ona tanba Timor-Leste livre ona no agora lideransa sira iha dezafiu boot atu servisu maka’as liután hodi ” liberta povu husi kiak, ida ne’e hanesan luta ida ne’ebé la’os fásil, maibé presiza kooperasaun, unidade no hanoin hikas sakrifísiu jerasaun pasadu sira nian”, nia afirma.
Husu kona-ba lider sira ne’ebé to’o agora seidauk halo dame no ignora malu, eis Primeira Dama ne’e husu ba públiku atu labele preokupa ho atetude lider tuan sira nian tanba futuru Timor-Leste depende ba jerasaun foun sira.
“Ha’u hanoin lider tuan sira sei la hamutuk ho ita ba tempu naruk, sira mós katuas ona, agora daudaun futuru Timor nian iha jerasaun foun sira nia liman, jerasaun foun sira tenke mantein unidade no pás no ba ida ne’e ha’u hanoin keta preokupa demais ho atitude jerasaun tuan sira “Sira katuas ona, agora ita fo esperansa ba jerasaun foun,” nia dehan.
Nu’udar fundadora Fundasaun Alola, Kirsty Sword sente triste haree katak sei iha problema barak hanesan taxa malnutrisaun iha rai laran, violénsia no diskriminasaun hasoru feto, maibé bainhira kompara ho tinan 20 liubá konserteza ida-ne’e iha progresu no ida-ne’e fó esperansa foun.
“Ha’u hein katak ita-nia sosiedade bele iha nafatin esperansa, pasiénsia no motivasaun atu servisu maka’as, tanba ne’e la’ós de’it responsabilidade no devér governu nian, maibé ita hotu-hotu nian,” nia konklui.
Jornalista: Hortencio Sanchez
Editór: Florencio Miranda Ximenes
