DILI, 27 Fevereiru 2025 (TATOLI) – Komisaun G iha Parlamentu Nasionál (PN) ne’ebé trata asuntu Edukasaun, Juventude, Desportu no Sidadania, aprezenta ezbosu projetu-lei alterasaun lei númeru 14/VI/2008, 29 Outubru kona-ba Lei Baze Edukasaun.
“Kona-ba konteúdu sei iha prosesu diskusaun, ami garante iha 2025 bele aprova,’’ Prezidente Komisaun G, Deputadu Armando Lopes, informa ba jornalista sira hafoin reuniaun komisaun iha PN, kinta ne’e.
Razaun Komisaun G ne’ebé trata asuntu Edukasaun, Juventude, Desportu no Sidadania, aprezenta alterasaun atu apár ho situasaun atuál ligada ba setór edukasaun.
Esbozu ne’e halo ona distribuisaun ba deputadu membru komisaun, parte legál sei haree.
Parte komisaun mós sei halo audiénsia ho manorin na’in, diretór edukasaun munisípiu no Ministériu Edukasaun ho entidade relevante sira seluk rona sira-nia hanoin atubele ajusta iha alterasaun ne’e.
Nia argumenta, alterasaun lei baze edukasaun ne’e foka ba pre-eskolár, ensinu báziku, sekundáriu jerál no tékniku vokasionál.
“Ajusta tuir situasaun rai-laran hasa’e kualidade edukasaun ba futuru,’’ nia akresenta.
Notísia relevante: https://tatoli.tl/2025/01/08/komisaun-g-sei-fo-prioridade-altera-lei-baze-edukasaun/
Jornalista: Nelson de Sousa
Editór: Evaristo Soares Martins
