OÉ-CUSSE, 11 dezembru 2023 (TATOLI – Ekipa Komisaun Tranzisaun IX Governu Konstitusionál, lideradu Sebastião Jose Luís dos Santos Pereira, segunda ne’e simu ona relatóriu servisu Prezidente Autoridade Rejiaun Administrativa Espesiál Oé-Cusse Ambeno (RAEOA) sesante, Arsénio Paixão Bano, hamutuk ho membru autoridade sira.
Serimónia entrega relatóriu ne’e, realiza liuhosi enkontru formál ne’ebé hala’o iha salaun Gabinete ZEESM Oé-Cusse.
Notísia relevante: Governu estabelese komisaun tranzisaun iha RAEOA
“Ohin, ami hasoru malu ho Autoridade RAEOA simu ofisialmente relatóriu servisu hosi Prezidente Autoridade RAEOA ho nia estrutura, ami sei halo analiza no halo avaliasaun ba relatóriu sira-ne’e, depois bele hato’o ba Primeiru Ministru, kona-bá relatóriu ne’ebé ohin ami simu ona,” Koordenadór Komisaun Tranzisaun, Sebastião Jose Luís dos Santos Pereira, ba jornalista sira iha Oé-Cusse.
Koordenadór Komisaun Tranzisaun ne’e, informa, sorumutu ne’e la’ós hand over ba servisu maibé hand over ba relatóriu, tanba ekipa tranzisaun nia prezensa iha Oé-Cusse la’ós atu troka direita líder sesante sira iha RAEOA, maibé kumpri de’it despaxu Primeiru Ministru atu simu de’it relatóriu sira molok nomeia líder foun atu lidera fali Oé-Cusse.
Prezidente Autoridade RAEOA sesante, Arsénio Paixão Bano, rekomenda ba ekipa tranzisaun, atu trata asuntu relatóriu Autoridade ho responsabilidade hodi hato’o ba Primeiru Ministru, tanba asuntu Estadu no labele publika ho livremente iha mídia sosiál.
“Hanesan Prezidente Autoridade sesante, ha’u entrega ona relatóriu, mekanizmu servisu ami deskuti uitoan, Autoridade iha fatin ida, ekipa tranzisaun sira bele servisu ho tékniku ema na’in-lima hosi Autoridade, ita haruka sira ativa atu fasilita relatóriu sira no sasán ne’ebé sira presiza, ohin mós ami husu ekipa komisaun, katak relatóriu ne’e ba Primeiru Ministru la’ós ne’e ba fali sira iha li’ur ka facebook, tanba ne’e asuntu Estadu ita tenke trata hanesan ne’e,” nia katak.
Nia agradese ba ekipa tranzisaun bele kumpri despaxu Primeiru Ministru tanba tranzisaun ba Autoridade sesante importante nune’e bele prepara no kria kondisaun di’ak molok nomea líder foun ba RAEOA.
“Ekipa mai la’ós atu troka, maibé tuir despaxu Primeiru Ministru nian, ne’ebé ha’u hanoin servisu la’o hanesan bainbain, tranzisaun ba ha’u ne’e importante ba preparasaun sasán di’ak, ida foun mai troka ho di’ak, ne’e ba interese Oé-Cusse no Timor-Leste, ne’ebé hotu-hotu hakmatek husik komisaun hala’o nia servisu,” nia apela.
Notísia relevante: Autoridade RAEOA kontinua hein despaxu ofisiál hosi Primeiru Ministru
Entretantu, antes ne’e Primeiru Ministru (PM) Kay Rala Xanana Gusmão, liuhosi despaxu númeru 014/PM/VII/2023, ne’ebé formaliza iha loron 01 dezembru 2023, harii Komisaun Tranzisaun ba mandatu Membru Autoridade RAEOA.
Iniasiativa ne’e mai hosi alterasaun lejizlativa ne’ebé prevee ona iha Lei númeru 18/2023, loron 30 novembru, ne’ebé automatikamente determina termu funsionáriu sira inklui Prezidente Autoridade RAEOA, Arsénio Paixão Bano.
Notísia relevante: Arsénio Bano sei la defende OJE 2024 bá RAEOA iha PN
Jornalista: Abílio Elo Nini
Editór: Evaristo Soares Martins
