DILI, 11 fevereiru 2023 (TATOLI)— Komisaun Nasional Aprovizionamentu (CNA, sigla portugés), sesta ne’e, fó sai ona kompañia manán na’in ba konkursu públiku reabilitasaun estrada urbana postu administrativu Maliana, munisipíu Bobonaro.
Bazeai ba nota komunikadu ne’ebé Agência Tatoli asesu sábadu ne’e, kompañia ne’ebé sai manán na’in ba projetu reabilitasaun estrada urbana Maliana mak kompañia internasionál PT. Hutama Karya (Parsero) Indonézia ho nia montante orsamentu hamutuk $21.228.762.00
Maske CNA fó ona kompañia manán na’in ba projetu reabilitasaun estrada Urbana Maliana maibé Ministériu Obra Públika (MOP) sei aprezenta ba Konsellu Ministru hodi hetan autorizasaun.
“Tanba tuir prosesu, Kámara Konta mak sei fó vistu ikus ba projetu refere antes ba halo lansamentu,” hakerek nota komunikadu.
Antes ne’e, Governu liuhosi reuniaun Konsellu Ministru aprova ona projetu ne’ebé aprezenta hosi Ministru Obra Públika Abel Pires, hodi autoriza prosedimentu aprovizionamentu estrada urbana Maliana pakote I ho valór globál ne’ebé estimasaun $16,314.392,06. Enkuantu estrada urbana Maliana pakote II ho estrada prinsipál ne’e ninia estimasaun valór globál $23,587.019,36.
Jornalista : Arminda Fonseca
Editora : Armandina Moniz
