KOVALIMA, 12 Marsu 2026 (TATOLI) – Xefe Suku sira iha Munisípiu Kovalima husu Governu hadi’a estrada liga husi munisípiu ba postu administrativu sira, hodi fasilita komunidade lori produtu ba merkadu.
Xefe Suku Belekasak, Leonito Gusmão dehan, estrada ne’e importante ba komunidade sira oinsá atu fasilita komunidade sira-nia movimentu ho transporte públiku no privadu lori sira-nia produtu ba merkadu.
“Ita ko’alia kona-bá estrada liga husu postu mai iha munisípiu liga ba postu administrativu sira, iha tinan kotuk konstrui estrada kilómetru 10 maibé estrada liga husi Maukatar ba Lela kontinua liga ba postu administrativu Fatululik hodi liga ba Bononaro ne’e grave tebes,” Xefe Suku Belekasak, Leonito Gusmão hato’o preokupasaun ne’e ba Governu iha resintu AMC.
Aleinde ne’e estrada ligasaun husi Aeroporto iha munisípiu liga ba Suku Matai, postu administrativu Maucatar importante presiza atu haree hodi fasilita komunidade sira.
Iha sorin seluk, Xefe Suku Lepo Jacob da Costa, hato’o preokupasaun komunidade kona-bá estrada bee mean, husi postu Zumalai liga ba Munisípiu Bobonaro.
“Ami ko’alia liga ba estrada maibé estrada iha bee mean estrada liga ba iha Bobonaro presiza atu haree tanba estrada referidu estrada kagoria nasionál ne’ebé durante karreta sira baku fila tanba haree kondisaun estrada grave,”. nia dehan.
Ho kondisaun Estrada ne’ebé grave hodi difikulta movimentu transporte públiku no privadu ba komunidade sira atu lori sira-nia produtu ba fa’an iha merkadu hodi hetan osan atu sustensa sira–nia família.
Xefe Suku Belulik Leten, Postu administrativu Fatumea, Oscar Perreira Amaral, informa, daudaun iha tempu udan, kondisaun Estrada kuaze grave iha postu administrativu sira.
“Ami ko’alia estrada husi Fatumea liga ba iha Munisípiu haree ne’e sai problema ba komunidade sira, ho kondisaunn estrada aat motorizada ami hulan de”it, tanba estrada nakonu ho tahu,” nia dehan.
Hatán ba preokupasaun hirak-ne’e, Ministru Planiamentu no Investimentu Estratéjiku (MPIE), Gastão Sousa esplika, Kovalima hetan reabilitasaun estrada lubuk ida nune’e tenke pasiénsia.
“Estrada husi Maukatar no bee mean no estrada sira seluk sei halo estudu no halo hela dezeñu hela, tenke pasiénsia hodi hein tanba ne’e sei haree estrada ba munisìpiu sira seluk,” nia esplika.
Kondisaun estrada ne’ebé maka xefe suku sira hato’o, MPIE sei koordena ho Ministru Obra Públika hodi haree estrada ne’ebé mak prioridade tuir prioridade ne’ebé mak define ona.
Jornalista: Celestina Teles
Editór: Evaristo Soares Martins
