BAUCAU, 19 abríl 2023 (TATOLI) – Prezidente Partidu Frente Revolusionária Timor-Leste Independente (FRETILIN), Francisco Guterres ‘Lú Olo’, hateten tuir loloos ukun aan tinan-20 ona povu Timor-Leste moris di’ak ona, maibé to’o oras ne’e seidauk bele ultrapasa kondisaun ne’e.
“Tinan-20 ona Timor-Leste restaura independénsia, tuir loloos ohin loron povu ida-ne’e moris di’ak ona, tinan-20 la’ós oituan, maibé ita sei haree ita-nia inan-aman, maun-alin sira, ita-nia ema sira sei halerik nafatin kona-ba sira-nia moris,” Prezidente Partidu FRETILIN hateten bainhira abertura kampaña eleitorál iha Cairavela, postu Vemasse, kuarta ne’e.
Eis Prezidente Repúblika ne’e argumenta, prosesu eleisaun parlamentár implementa no halo tuir dalan KRDTL nune’e presiza votu povu nian, partikularmente militante no simpatinzante FRETILIN nian hotu atu lori FRETILIN ukun rai no povu hodi halo dezenvolvimentu iha Timor-Leste.
Nia dehan, durante tinan-20 Timor-Leste restaura independénsia povu sei kontinua falta ai-haan, laiha osan atu oan asesu ba edukasaun, laiha ai-moruk kura moras, má-nutrisaun no problema seluk tán.
Povu Timor-Leste merese tenke hetan moris di’ak la’ós grupu balun de’it mak hetan oportunidade durante tinan-20.
“Iha fatin ida-ne’e atu hatete ba kamarada sira katak kampaña hahú ohin, ita hotu hatene katak lejitimidade ida atu ba kaer ukun liuhosi vontade povu nian iha urna,” Lu Olo akresenta.
Bainhira manán iha eleisaun parlamentár tinan-ne’e, FRETILIN sei garante edukasaun ho kualidade ne’ebé di’ak hanesan hadi’a sistema kurrikulár nune’e jerasaun kontinuadór sei kaer futuru nasaun nian no hadi’a infraestrutura hanesan hadi’a eskola.
Nune’e mós presiza hadi’a nutriasaun ba oan sira nune’e kontinua hakbiit família kada uma-kain, rezolve problema veteranu ne’ebé kontinua sai polémika iha komunidade, haloot restu mortál no hametin estadu hanesan órganu soberania sira tuir K-RDTL.
Notísia relevante: FRETILIN sei hadi’a uluk estadu bainhira manán iha eleisaun parlamentár
Jornalista : Natalino Belo
Editór : Evaristo Soares Martins
