DILI, 12 maiu 2023 (TATOLI) – Xefe Departamentu Sentru Nasionál Matan iha Hospital Nasionál Guido Valadares (HNGV) Julia Rosalina Cesar Magno, informa moras katarata afeta ba ema idade 50 ba leten.
“Ema ne’ebé durante afeta makas ba moras katarata ne’e mai husi idade 50 ba leten liuliu katuas no ferik sira mak durante ne’e mai halo tratamentu ba moras ida ne’e iha sentru matan”, Julia Rosalina Cesar Magno, informa ba TATOLI bainhira halo entervista eskluziva iha edifísiu TATOLI.IP, ohin.
Nia haktuir, matan katarata ne’e mai hosi idade ferik ho katuas. Hirak ne’e mai halo operasaun depois rekopera hafoin sira fila ba hela fatin.
Nia dehan, ema sira ne’ebé mak mai halo tratamentu ba moras katarata ne’e mai husi munisípiu hotu maibé balun ne’ebe iha kbiit mak mai halo tratamentu iha nasionál, entaun husi Sentru Nasionál Matan kada fulan halo atividade konsulta matan ba área rurál sira hodi fó tratamentu ba pasiente sira ne’ebé mak ho probelma moras katarata.
“Ami sempre lao ba atividade konsluta matan ba área rurál sira fó tratamentu ba ema moras matan katarat tanba ita haree komunidade barak la iha kbiit atu asesu ba fasilidade saúde sira atu halo tratamentu sira nia matan”, nia informa.
“Uluk mak ema ladún hanoin kona-ba sira-nia matan, agora sira iha ona hanoin katak matan ne’e importante ba sira nia saúde”, nia subliña.
Tanba ne’e, Sentru Nasionál Matan nafatin fó informasaun ba populasaun sira iha área rurál atu ba halo tratamentu matan katarata tanba moras ne’e mai husi fatór idade sira.
“Moras katarata ne’e akontese ba ema idade tanba lensa orijinál iha ita-nia matan ne’e mak lakon ona sira labele haree buat ruma sai malahuk hotu entaun naroman sira ne’ebé iha la bele haree, ida ne’e presiza halo oeprasaun”, nia akresenta.
Nia reafirma, katarak nia impkatu mós mai husi loron matan, entaun bainhira ba ne’ebé de’it presiza óklu hodi bele proteje loron nia manas no tenke han aihan ne’ebé mak saudável atu bele fó proteina ba matan.
Tanba ne’e, nia husu ba populasaun hotu bainhira moras matan karik ba fasilidade saúde ne’ebé mak besik hodi halo tratamentu, labele ba buka aimoruk tradisionál hodi kura matan.
“Ha’u husu ba maluk sira bainhira problema matan ba lalais fasilidade saúde ne’ebé mak besik, labele ba kura fali aimoruk tradisionál sira tanba sei estraga ita-nia matan“, nia sujere.
Nia afirma, ekipamentu sira Sentru Nasionál Matan sufisiente hodi halo dignosa matan no operasaun ba moras katarat nian.
Iha 2022 Sentru Nasionál Matan iha Hospital Nasionál Guido Valadares (HNGV) rejista moras katarata hamutuk 11 mil.
Jornalista : Felicidade Ximenes
Editór : Zezito Silva
