DILI, 21 Outubru 2025 (TATOLI) – Ministériu Komérsiu no Indústria (MKI) lansa Programa MCI Award 2025 ba Mikro, Pekena no Médiu Empreza atu kompete.
Diretór-Jerál Komérsiu MKI, Nelito Lima de Araújo, hateten Programa MCI Award 2025 ne’ebé MKI lansa ne’e hanesan programa ministériu nian ne’ebé hala’o kada tinan rua.
“Ita hala’o iha 2023, ita fó ona prémiu ba ita-nia manán-na’in sira husi Mikro, Pekena no Médiu Empreza. Prémiu ida-ne’e ita fó hanesan apresiasaun tomak ba sira durante sira-nia serbisu, dedikasaun, ba sira-nia empreza. Entaun ita valoriza sira ho prémiu ne’ebé ita fó”, Nelito Lima Araújo dehan iha Bebora, Dili.
Tuir nia, ida-ne’e la’ós prémiu boot ida, maibé hanesan sertifikadu atu fó hanoin ba sira katak sira sai hanesan parseiru MKI nian.
“Ho ida-ne’e mak ami hakarak hala’o nafatin atividade ida-ne’e kada tinan rua, nune’e valoriza nafatin ita-nia empreza ki’ik sira. Atividade ida-ne’e mós la hala’o de’it iha munisípiu Dili, maibé sei hala’o hotu iha munisípiu 12 inklui Oekusi. Depoizde lansamentu, ekipa MKI sei tun terrenu atu halo levantamentu dadus ba empreza ki’ik sira ne’ebé agora ezisite hela”, nia realsa.
Bainhira ekipa rekolla hotu dadus maka sei envolve kada ministériu atu halo análize hodi hili ida-ne’ebé sai vensedór ba MCI Award 2025 iha Dezembru.
Iha fatin hanesan, Diretór Nasionál Apoiu Dezenvolvimentu Mikro, Pekena no Médiu Empreza, Reinaldo Borges, hateten MCI Award 2025 tinan ne’e ho tema “Inovasaun ba Kreximentu no Reziliénsia Ekonómika”.
“MKI nu’udar instituisaun Governu nian ne’ebé responde ba elaborasaun, ezekusaun, koordenasaun no avaliasaun ba polítika ne’ebé aprova no define iha Konsellu Ministru ba atividade ekonómika ne’ebé ligadu ho setór oioin”, nia dehan.
Prémiu ka MCI Award ne’e bazeia bá dekretu-lei númeru 72 /2023, loron 14 fulan-Setembru, iha orgánika ministériu nian mensiona responsabilidade atu dezenvolve setór emprezariál hahú husi Mikro, Pekena no Médiu Empreza nu’udar xave ba dezenvolvimentu ekonómiku no moris dignu ba komunidade nian.
“Objetivu husi programa ida-ne’e atu rekoñese papél Mikro, Pekena no Médiu Empreza. Ita hahú ho objetivu hanesan valoriza kontribuisaun Mikro, Pekena no Médiu Empreza ne’ebé bele rezolve problema sosiál, hamosu modelu ezemplár ba Mikru, Pekena no Médiu Empreza iha territóriu”, nia subliña.
Nia esplika definisaun no klasifikasaun Mikru, Pekena, Médiu no Grande Empreza tuir Dekretu-Lei númeru 30/2023, 31 Maiu, kona-ba medida apoiu ba Mikru, Pekena no Médiu Empreza no nia klasifikasaun bazeia ba kritériu sira númeru traballadór empreza nian no balansu totál anuál ka arrendamentu empreza sira-nian.
Bainhira iha prova katak, dokumentu sira ne’ebé mesiona mak ekipa júri bele klasifika empreza ne’e tuir duni klasifikasaun ne’ebé define ona husi MKI.
Kritériu selesaun ba Mikru, Pekena no Médiu Empreza mak empreza ida atu hetan rekoñesmentu iha Programa MCI Award 2025 tenke prienxe rekezitu sira mak hanesan na’in empreza timoroan, no estranjeiru, maibé halo atividade iha Timor-Leste.
Ezisténsia empreza mínimu tinan lima, kontinua emprega no selu traballadór hahú husi pandemia Covid-1, kontinua selu impostu, hamosu inovasaun hodi kontribui ba diversifikasaun ekonomia nasionál, estensaun merkadu iha nivel nasionál no internasionál, hala’o atividade iha setór komérsiu no indústria, kumpri regra ambientál, ijiene no seguransa no hola parte mós esportasaun ba produtu lokál sira no seluk tan.
Ba metodolojia ba klasifikasaun, iha definisaun katak empreza ida tenke kumpre rekizitu sira hanesan iha dokumentu ofisiál, empreza rejistadu iha SERVE, tenke selebra kontratu ka prova pagamentu saláriu ba traballadór sira, no seluk tan.
“MCI Award 2025 fó oportunidade ba ema hotu atu kompete, maibé tenke kumpre regra sira ne’ebé tau. Kona-ba montante orsamentu ba programa ida-ne’e daudaun seidauk bele fó sai, hein ekipa rekolla hotu dadus mak foin bele define montante ba vensedór sira”, nia informa.
Ministru Komérsiu no Indústria, Filipus Nino Pereira, hateten programa ida-ne’e planu ba rekuperasaun ekonómika. “Ita-nia Mikro, Pekena no Médiu Empreza eziste maski hasoru dezafiu oioin hanesan asesu bá merkadu, finanseiru, maibé sira kontinua iha fó serbisu ba maluk sira seluk”, dehan.
Tuir governante, importante tebes atu Mikru, Pekena no Médiu Empreza bele metin iha sira-nia kapitál no asesu bá merkadu hodi fortalese sira-nia an di’ak liután hodi diversifika ekonomia no negósiu no fó serbisu ba ema barak.
Jornalista: Arminda Fonseca
Editora: Maria Auxiliadora
