DILI, 14 abríl 2023 (TATOLI)—Diretór Jerál Ministrériu Solidaridade Sosiál no Inkluzaun (MSSI), Rui Manuel Gago Exposto, hateten MSSI sei adia prosesu pagamentu ba benefisiáriu programa Bolsa da Mãe Jerasaun Foun, (BdM-JF) durante periodu kampaña to’o eleisaun lejizlativa.
“Ita deside ona pagamentu ba benefisiáriu programa BdM – JF sei pauza durante periodu kampaña eleitorál, hahú husi loron 19 abríl 2023, no sei kontinua hala’o fali pagamentu iha 22 maiu 2023,” Rui Exposto, hateten iha komunikadu ne’ebé Tatoli asesu, ohin.
Nia esplika iha ámbitu kampaña eleitorál ne’ebe hala’o husi partidu polítiku, MSSI sei adia prosesu rejistrasaun no pagamentu ba benefisiáriu sira iha munisípiu Ainaro, Bobonaro, RAEOA, Viqueque , Manatutu , Covalima no Liquiça.
Mninistériu Solidaridade Sosiál no Inkluzasaun Sosiál to’o oras ne’e rejista ona inan isin rua hamutuk 6.081, maibé lista aprovadu hodi sai benefisiáriu ba programa ne’e hamutuk 5.672.
No labarik sira ne’ebé rejistu ona hamutuk 31.363, husi númeru ida-ne’e, lista naran ne’ebé maka aprovadu ho totál 29.847. Ba labarik ho kondisaun defisiênsia rejista ona hamutuk 146, husi númeru ida ne’e , lista aprovadu ho totál 133.
Banku Nasionál Komérsiu Timor-Leste (BNCTL) servisu hamutuk ho Ajénsia T-Pay (TELKOMCEL) maka fasilita prosesu pagamentu no aplikasaun dokumentu ba labarik no inan isin-rua.
Enkuantu, Mosan (Telemor) mak responsabiliza prosesu pagamentu ba benefisiáriu sira husi Munisípiu Viqueque, Manatutu , Covalima no Liquiça.
Tan ne’e , kontratu ho Telemor atu halo pagamentu ba benefisiárius husi Munisípiu Viqueque , Manatutu , Covalima no Liquiça, sei hahú iha fulan-abríl 2023-2025.
Tuir planu iha semana oin sei estabele kontratu ho kompañia Telemor ho durasaun tinan rua (abríl 2023-abríl 2025) hodi fasilita prosesu pagamentu ba benefisiáriu sira iha Munisípiu Viqueque, Manatutu , Covalima no Liquiça.
Dekretu – lei númeru 22/2021 , ko’alia kona-ba kria subsídiu ba inan grávida no labarik sira ne’ebé mak hanaran ” bolsa da mãe jersaun foun “, ne’ebé mak halo altersaun dahuluk ba dekretu – lei númeru 18/2012 , 04 abril .
Jornalista : Osória Marques
Editór : Agapito dos Santos
