BOBONARU, 24 Marsu 2026 (TATOLI) – Agrikultór sira hein Ministru Agrikultura Pekuária, Peska no Floresta (MAPPF), Marcos da Cruz, atu kumpre promesa katak sei implementa projetu reabilitasaun ba irrigasaun Marku, iha postu administrativu Kailaku, munisípiu Bobonaru.
“Foin lalais ami rona Ministru Agrikultura promete dehan tau ona osan iha tinan ida-ne’e atu hadi’a irrigasaun Marku. Hanesan povu agrikultór ami laran-metin no fiar katak ministru koalia ne’e la bosok, sei halo duni tanba tinan barak ona irrigasaun ne’e aat, nia impaktu natar barak mak abandonadu”, agrikultór Filomeno Afonso de Jesus dehan ba Tatoli, iha Samutaben, ohin.
Natar-na’in Adelino Amaral mós husu seriedade Governu atu rezolve irrigasaun Marku. “Ami fiar ida-ne’e la sai promesa de’it, tanba tinan barak ona Governu ida ba Governu seluk promete atu hadi’a, to’o ohin loron la halo”, nia lamenta.
Irrigasaun Marku konstrui iha tempu Indonezía no to’o agora kuaze aat totál. “Tinan-tinan kuandu tama ona époka dahuluk atu hatama bee ba natar, ami tenke bolu malu ba hasa’e bee iha intek. Dalaruma mákina husi Ministeriu agrikultura nia mai hasai tahu ho rai-henek mak bee foin liu di’ak”, nia dehan.
Antes ne’e, iha reuniaun avaliasaun kondisaun mínima munisípiu Bobonaru ne’ebé realiza iha semana kotuk, Ministru Marcos da Cruz deklara ba autoridade munisípiu no postu, líder komunitáriu no populasaun sira katak irrigasaun Marku nia prosesu atu tama ba konkursu públiku.
Nia rekoñese katak durante tinan barak komunidade Kailaku enfrenta problema kona-be bee iha irrigasaun ne’e atu halo natar.
“Kailaku iha rai-boot ida, entaun ita tau ona orsamentu ba tinan ida-ne’e. Prosesu atu ba konkursu. Ita atu halo irrigasaun ba área ektare 625, más agora funsionáriu ho mákina pezada normaliza hela kanál ne’e, ema iha ne’ebá halo daudaun natar, soké ninia irrigasaun ne’e mak presiza halo duni”, governante ne’e realsa.
Tuir dadus husi Administrasaun Postu Administrativu Kailaku, total área potensiál ba natar iha Kailaku pur volta ektare 1.000 husi Bilimau, Marku to’o Mautalo.
Notísia relevante: Natar ektare 200 iha Meligo ‘abandona’ tanba irrigasaun la funsiona
Jornalista: Sergio da Cruz
Editora: Maria Auxiliadora
