VIKEKE, 12 Abríl 2026 (TATOLI)—Servisu Rejistu Sivíl Munisípiu Vikeke durante trimestre dahuluk tinan ne’e konsege prodús sertidaun moris hamutuk 952.
“Kona-ba atendimentu sertidaun moris husi Fulan Janeiru to’o Marsu, ami emite ba sidadaun sira hamutuk 952, kompostu husi mane na’in-467 no feto na’in-485, sertidaun kazamentu 33, sertidaun óbitu 17. Atendimentu hirak ne’e ba abitante sira iha Munisípiu Vikeke,” Diretór Rejistu Notariadu Munisípiu Vikeke, Rogério da Costa, informa ba Ajénsia TATOLI, iha Postu Vikeke Vila, Domingu ne’e.
Nia dehan, atendimentu atu trata dokumentu hahú Segunda to’o Sesta, bazeia ba rekursu umanu no fasilidade ne’ebé daudaun ne’e iha.
“Ita hakarak hasa’e númeru atendimentu, maibé ami menus rekursu no fasilidade IT, entaun ita labele atinje. Maibé, ami nafatin esforsu atende abitante sira-ne’ebé mai trata dokumentu,” nia akresenta.
Notísia relevante : Janeiru-Jullu, Notariadu Vikeke prodús BI no Sertidaun Moris hamutuk 8.853
Kada loron Servisu Notariadu fó atendimentu ba abitante hamutuk na’in-30, maibé dalaruma iha impedimentu hanesan eletrisidade no liña internet, nune’e difikulta atendimentu.
“Ami mós haree dokumentu ne’ebé urjente ba rai-li’ur ami atende uluk, inklui idozu sira mai trata sira-nia dokumentu ami atende lalais atu sira labele la’o bá-mai trata sira-nia dokumentu,” nia akresenta.
Notariadu mós hasoru dezafiu hanesan menus ekipamentu no rekursu umanu.
“Ami presiza komputadór ne’e aumenta tolu, presiza apoia mákina scan hodi responde ba dokumentu sira-ne’ebé presiza scan. Preokupasaun sira-ne’e ami relata ona ba nasionál, maibé to’o agora seidauk responde,” nia katak.
Servisu Notariadu Munisípiu Vikeke daudaun ne’e iha funsionáriu permanente na’in-lima, kazuál na’in-ida, ho totál hamutuk na’in-15 hodi fó atendimentu ba abitante iha Munisípiu Vikeke.
Jornalista : Vitorino Lopes da Costa
Editora : Julia Chatarina
