DILI, 02 Outubru 2025 (TATOLI)–Autoridade Suku Ossoala, Postu Administrativu Vemasse, Munisípiu Baukau, preparadu atu tuir kompetisaun suku ne’ebé hala’o husi Ministériu Administrasaun Estatál (MAE) iha Baukau.
“Suku Ossoala preparadu. Mezmu kompetisaun ne’e foin atu realiza maibé serbisu sira-ne’e ita implementa hela,” Xefe Suku Ossoala, Francisco Gama da Costa Lobo informa ba TATOLI iha Pateo, Dili, Kinta ne’e.
Lobo esplika Suku Ossoala prenxe kritéria husi juri, ne’ebé durante ne’e implementa rutina iha suku liuliu kona-ba lala’ok servisu administrasaun no jestaun finanseira tuir regra no kompeténsia ne’ebé atribui liuhosi Lei Suku númeru 9/2016.
Xefe Suku hetan apoia pesoál na’in-haat hanesan sekretáriu suku ne’ebé foka ba planeamentu no dezenvolvimentu, pesoál apoia finansa ne’ebé tau-matan ba orsamentu opersionál suku no administrasaun relasiona ho dokumentu ofisiál sira no asuntu sosiál ne’ebé hala’o kna’ar atu rekolla dadus idozu, kanaliza ba serbisu relasiona ho asuntu dezastre no apoia sosiál.
“Kompetisaun ne’e di’ak tanba suku ne’ebé vensedór bele sai ezemplár hodi motiva líder komunitáriu husi suku seluk atu servisu maka’as liután tuir matadalan no lei haruka,” Lobo akresenta.
Ministériu Administrasaun Estatál (MAE) liuhosi Diresaun Nasionál Apoia ba Administrasaun Suku (DNAAS) sei hala’o kompetisaun entre suku iha kada munisípiu iha fulan-Outubru to’o Novembru ho objetivu atu avalia no sukat prosesu dezenvolvimentu ne’ebé implementa husi Governu sentrál ba suku sira.
Objetivu seluk mak atu haree inisiativa dezenvolvimentu husi xefe suku sira hanesan edukasaun, saúde, ambientál, seguransa no funsionamentu livru 18 administrasaun suku nian.
Aleinde ne’e, hametin papél suku nu’udár unidade xave ba governasaun lokál, promove no enkoraja inovasaun kona-ba pratika servisu administrasaun iha suku no motiva partisipasaun komunidade liuliu hasa’e inisiativa dezenvolvimentu lokál.
Entretantu, tuir planu, suku ne’ebé sai vensedór ho kategoria klasifikasaun dahuluk sei reprezenta munisípiu ba nasionál. Klasifikasaun daruak no datoluk sei to’o iha Autóridade Munisipál Baukau hodi hein atribui sertifikadu no prémiu iha selebrasaun 28 Novembru tinan ne’e.
Jornalista: Natalino Belo
Editór: Xisto Freitas da Piedade
