JAKARTA, 20 outubru 2024 (TATOLI) – Primeiru Ministru (PM), Kay Rala Xanana Gusmão, kongratula Prabowo Suabianto no Vise Prezidente Repúblika Indonézia, Gibran Rakabuming Raka, ne’ebé simu pose nu’udar Prezidente no Vise Prezidente Repúblika ba períodu tinan 2024 to’o 2029.
Xefe Governu, Xanana Gusmão, prezensa iha Indonézia nu’udar resposta ba konvite husi governu Indonézia hodi partisipa iha serimonia pose ba Prezidente Prabowo Suabianto no Vise Prezidente Repúblika, Gibran Rakabuming Raka iha Parlamentu Nasionál Indonézia (MPR, sigla indonézia).
“Di’ak tebes, ho hanoin katak nia (Prabowo) hakarak unidade nasionál no hakarak tau uluk nasaun no inklui povu nu’udar devér responsabilidade boot liu,” Primeiru Ministru Xanana Gusmao hateten iha MPR Jakarta, domingu ne’e.
Xanana sente kontente tanba bele partisipa hamutuk ho xefi estadu no governu inklui diplomata husi nasaun seluk iha serimónia pose referida no urgullu ho diskursu husi Prabowo ne’ebé tane aas interese nasaun no hasees interese privadu hanesan hala’o programa hahan no problema seluk iha Indonézia.
Primeiru Ministru, informa, Indonézia nia relasaun internasionál buka akumula nasaun hotu no lakohi inimigu no aliadu maibé hakarak buka amigu inklui iha relasaun di’ak ho Timor-Leste.
“Hanesan ho Timor-Leste, la’ós buka inimigu ho aliadu maibé hotu-hotu amigu. ne’ebé nia espetativa, agora preokupa atu dezenvolve nia rai, maibé ha’u la fiar katak nia atu muda buat ruma kona-ba relasaun entre Timor ho Indonézia,” Xanana Gusmao akresenta.
Bainhira hatan ba pergunta kona-ba ukun Prabowo ba tinan-lima mai ligadu ho Timor-Leste nia interese hanesan urna saudozu eroi sira inklui problema fronteira terestre entre rai-rua, Xefe governu Xanana resposta ho simples, katak prosesu sira-ne’e hotu defisil.
Primeiru Ministru, Xanana Gusmao nia prezensa iha Indonézia, liuhusi iha aeroportu internasionál Soekarno-Hatta, no direitamente ho simu parade militár iha árreadór VIP.
Hafoin ne’e, kontinua simu benvindu husi embaixadór Timor-Leste iha Indonézia hamutuk delagasaun hotu iha otél Darmawansa, Jakarta Súl, sábadu, 19 outubru lokraik.
Prezidente Repúblika Indonézia, Prabowo Subianto, simu Primeiru Ministru Timor Leste, Kay Rala Xanana Gusmão, ho hamnasa no hakuak metin.
Notísia relevante: Konseitu dezenvolvimentu ekonomia azúl iha Açores bele sai referénsia ba Timor-Leste
Jornalista : Natalino Belo
Editór : Evaristo Soares Martins
