LISBOA, 19 outubru 2024 (TATOLI) – Primeiru Ministru (PM), Kay Rala Xanana Gusmão, konsidera konseitu dezenvolvimentu ekonomia azúl ne’ebé implementa iha Rejiaun Autónoma Azçores bele sai referénsia ba Timor-Leste iha futuru.
Iha vizita ne’e, Xefe Governu hala’o sorumutu ho líder Rejiaun Açores no dereitamente halo observasaun dezenvolvimentu infraestrutura bazea ba konseitu ekonomia azúl.
“Ita ba iha-ne’ebá atu aprende to’o iha-ne’ebé ona sira dezenvolve buat sira-nee, kapaas, la’ós aban kedas ita atu implementa, maibé to’o iha-ne’ebá (Timor) sei estuda, buka timoroan ne’ebé koñese portugés sei mai aprende iha-ne’e,” PM Xanana hateten.
“Timor-Leste presiza dezenvolve illa Atauro sai sentru biodiversidade hodi hanorin populasaun sira kona-ba prezerva tasi moos,” Primeiru Ministru Xanana Gusmão hateten iha Lisboa, sesta ne’e.
Nia dehan, Timor-Leste iha planu atu dezenvolve illa Atauro sai nu’udar sentru sentífika ba biodiversidade ne’ebé Timor-Leste mós hola parte iha akordu triángulu.
Xefe Governu konsidera rikeza iha tasi-laran sei lori benefísiu ekonomia hanesan prezerva tasi moos no fó impaktu klima di’ak.
“Ita sei halo buat ida-ne’e, atu kontribui mós ba iha ekonomia azúl,” Xanana Gusmão akresenta.
Xanana Gusmão, dehan, rikeza tasi iha Timor-Leste hanesan ikan aumenta beibeik, nune’e presiza dezenvolve la’ós de’it iha Atauro maibé inklui Jaco, Oe-Cusse no husi Com to’o Tutuala.
Xanana dehan, ba futuru Timor-Leste sei halo kooperasaun ho Governu Rejiaun Autónoma Açores ligadu ho kapasitasaun hanesan timoroan sei tuir formasaun iha illa referida nune’e mos parte Açores sei fó formasaun iha Timor-Leste.
Primeiru-Ministru Xanana Gusmão ho delegasaun iha Açores simu husi Prezidente Assembleia Lejizlativa, Luís Garcia no Xefe Gabinete, Roberto Vieira.
Alende ne’e, vizita edifísiu Relógio, iha área Colonia Alemã ne’ebé simu hosi Prezidente Rejiaun Autónoma Açores, José Manuel Boliero no Xefe Governu, Ricardo Madruga da Costa.
Rejiaun Autónoma Açores iha estatutu Polítika-Administrativa ne’ebé konstitui diploma jurídiku para-konstitusionál ho enkuadra autonomia hodi define kompeténsia sira hosi administrasaun rejionál autónoma no estrutura inklui funsionamentu órgaun auto-governu sira.
Notísia relevante: Primeiru Ministru hametin kooperasaun ho Prezidente Asembleia Repúblika Portugál
Jornalista : Natalino Belo
Editór : Evaristo Soares Martins
