DILI, 12 agostu 2024 (TATOLI)—Sekretáriu Jerál Parlamentu Nasionál (PN), Edgar Siqueira Martins, hateten iha tempu badak sei halo reabilitasaun ba Uma Komunikasaun iha PN, tanba kondisaun atuál la seguru ba jornalista destakadu sira-ne’ebé loro-loron hala’o kobertura atu fasilita sira hala’o serbisu.
Notísia Relevante: PPN-UE-PNUD inaugura sentru Uma Mídia Komunikasaun
“Loos, iha hela prosesu atu halo reabilitasaun. Ita koordena hela ho parseiru sira, ita sei halo reabilitasaun iha tempu badak,” nia hateten ba jornalista sira iha resintu PN, segunda ne’e.
Tuir observasaun jornalista TATOLI hatudu katak, daudaun ne’e iha Uma Komunikasaun iha PN nota katak, iha tempu udan bee tama nalihun iha laran no daudaun ne’e plafon sira dodook no balun besik atu monu, nune’e jornalista destakadu sira-ne’ebé durante ne’e utiliza fatin refere sente la seguru.
Iha fatin hanesan, Imelda Fátima, nu’udar jornalista husi mídia Timor Post ne’ebé durante ne’e destaka iha PN preokupa ho kondisaun refere nune’e sujere atu hadi’a.
Antes ne’e, iha 03 Maiu 2021, Prezidente Parlamentu Nasionál, Aniceto Longuinhos Guterres, Embaxadór Uniaun Europeia (UE), Andrew Jacobs no reprezentante United Nations Development Programme (UNDP/PNUD), Tuya Altangerel, inaugura sentru Uma Mídia Komunikasaun ne’ebé lokaliza iha resintu uma fukun Parlamentu Nasionál.
Uma Mídia Komunikasaun ne’e konstrui, hodi fasilita jornalista sira husi Parlamentu Nasionál no jornalista husi mídia públiku no privadu ne’ebé destaka iha PN atu hala’o kobertura atividade parlamentár nian.
Konstrusaun ba sentru mídia hola-parte hosi projetu desentralizasaun ho millaun $4, iha-ne’ebé, hamutuk ho inisiativa sira seluk, buka atu aselera transformasaun dijitál Parlamentu nian ba oin hodi lori lejizladór sira besik liu-tán ba povu.
Iha sentru ne’e ekipadu ho sala imprensa, espasu ida konferénsia imprensa no estúdiu rádiu, edifísiu ida-ne’e sei permite jornalista sira hodi fornese informasaun sira ne’ebé loloos no tuir tempu, nune’e promove komprensaun di’ak liu kona-ba funsaun no kna’ar Parlamentu nian.
Konstrusaun Uma Komunikasaun ida-ne’e parte ida husi PNUD nia projetu “Haforsa Dezenvolvimentu Lokál Integradu hodi apoiu desentralizasaun iha Timor-Leste’’ no “Programa ba Konsolidasaun Governasaun Ekonómika no Sistema Jestaun Finansa Públika iha PALOP-TL II’’, ne’ebé finansia husi Uniaun Europeia no PNUD.
Jornalista : Nelson de Sousa
Editór : Cancio Ximenes
