BOBONARO, 27 novembru 2023 (TATOLI) – Komandante Polísia Nasionál Timor-Leste (PNTL) munisípiu Bobonaro, Superintendente Xefe António Maria de Sá, apela ba komunidade hotu liuliu joven sira atu manetin pás no estabilidade iha selebrasaun Proklamasaun Inilaterál Independénsia, 28 Novembru ba dala-48 ne’ebé sei realiza kada postu administrativu.
Nia husu komunidade no joven sira iha munisípiu Bobonaro hatudu tiha ona dalan iha eventu Festivál Fronteira 2023 ‘Interkámbiu Kulturál ba Hametin Rekonsiliasaun’ tanba programa durante loron haat ne’e, hahú to’o finaliza PNTL la rezista kazu krime, insidente no asidente ruma maske akumula ema barak mai hosi Indonézia no munisípiu seleuk.
Notísia Relevante:PNTL Bobonaro sei atua grupu-individu kontra regra eleisaun
“Ninia referénsia mak eventu interkámbiu ne’e, buat hotu la’o di’ak, ne’e tanba juventude sira hatudu sira-nia kolaborasaun másimu. Halo tuir no rona mensajen sira-ne’ebé autoridade sira fó, partisipa másimu hodi fó susesu ba atividade ne’e, entaun fó tán imi-nia kontribuisaun dala-ida tán, tanba loron 28 Novembru ne’e loron istóriku,” nia ko’alia iha Maliana.
Komandante António de Sá agradese no kongratula joven sira, tanba dezde IX Governu deside suspende atividade arte-marsiál no rituál sira to’o ohin loron situasaun seguransa jeralmente iha munisípiu Bobonao la’o di’ak no hakmatek.
“Ha’u-nia espetativa hanesan ba juventude iha munisípiu Bobonaro kona-bá loron 28 Novembru ne’e, sira kontinua nafatin, sira komesa komprende ona, oinsá atu sai na’in ba rai ida-ne’e, oinsá kontinua nafatin sira-nia inan-aman, eroi sira-nia luta,” nia apela.
Notísia relevante: Autoridade Bobonaro aloka rihun $29 komemora 28 Novembru
Jornalista: Sérgio da Cruz
Editór: Evaristo Soares Martins
