DILI, 23 novembru 2023 (TATOLI)–Vise Ministru Administrasaun Estatál (MAE), Jacinto Rigoberto, hateten tomada de pose ba konsellu suku sei realiza iha kada postu administrativu iha territóriu nasionál.
Notísia Relevante: PN felisita xefe suku eleitu no husu serbí povu ho di’ak
“Tomada de pose sei la konsentra iha fatin ida maibé sei realiza iha kada postu administrativu sira iha munisípiu sira hotu. No, ida-ne’e membru Governu mak sei fó pose,” Governante ne’e hateten ba jornalista sira iha edifísiu MAE Caicoli, kinta ne’e.
Ministru Administrasaun Estatál (MAE) Tomás Cabral ho Primeiru-Ministru Kay Rala Xanana Gusmão hasai despaixu ida katak sei nomea kada membru Governu ida-idak partisipa maibé membru la to’o mak sei delega fali Diretór Jerál hodi partisipa iha içar bandeira ba 28 novembru depois kontinua kedas pose ba xefe suku eleitu sira.
Antes ne’e, Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten pose ba kompozisaun suku sei akontese iha 28 novembru 2023.
“Ita-nia xefe suku ho aldeia sira-ne’e sei fó pose hosi membru Governu sira iha loron proklamsaun 28 novembru, tanba lei suku nian hateten katak kompozisaun suku sei simu pose iha 28 novembru,” nia dehan.
Jornalista : Osória Marques
Editór : Cancio Ximenes
