VIQUEQUE, 25 agostu 2022 (TATOLI)—Postu Uatulari, munisípiu Viqueque implementa atividade 53 iha suku liuhosi programa ‘mão de obra’ postu administrativu (PMOPA).
“Ami iha postu Uatulari implementa atividade 53 hosi PMOPA tinan 2022 nian, ne’ebé fahe ba suku neen hodi halo limpeza iha suku laran no hamos baleta sira iha suku no aldeia laran,” Administradór postu Uatulari, Manuel do Rosário, hateten hafoin ramata abertura atividade PMOPA, iha suku Matahoi, kinta ne’e.
Nune’e, autoridade lokál no xefe planeamentu sei halo kontrolu kada loron ba implementasaun atividade.
“Atividade 53 ne’ebé sei implementa ba suku neen iha postu administrativu Uatulari ho tipu serbisu limpeza tuir estrada, hamos baleta, kuda ai-oan hodi prezerva rai halai no prezerva bee-matan sira iha Uatulari,” nia akresenta.
Notísia relevante: MAE sosializa matadalan implementasaun PMOPA autoridade sira iha Viqueque
Autoridade lokál ne’e enkoraja traballadór ne’ebé serbisu iha atividade PMOPA tenke hatudu badinas hodi hamos bairru laran sai ambiente moos nune’e komunidade bele moris saudável.
“Ha’u husu joven sira ne’ebé serbisu tuir PMOPA tenke serbisu ho di’ak halo limpeza iha bairru laran hodi sai ambiente moos. Tanba ha’u haree atividade ne’e di’ak no fó ona serbisu ba joven no inan-aman sira hodi bele hetan netik osan. Joven ne’ebé envolve atividade ne’e labele hamosu problema beibeik,” nia tenik.
Iha fatin hanesan, Xefe aldeia Uanama, suku Matahoi, Simão da Silva Oliveira, konsidera program ne’e fó benefísiu ba komunidade tanba bele hetan osan.
“Ha’u husu Governu nafatin implementa programa sira hanesan ne’e hodi tulun komunidade ne’ebé durante ne’e laiha serbisu,” nia realsa.
Nune’e mós, Traballadór PMOPA hosi suku Matahoi, Ana Paula Saldanha, sente kontente ho PMOPA tanba bele halo ambiente sai moos.
PMOPA implementa iha aldeia Uanama no Inaboba, suku Matahoi, ho totál traballadór hamutuk na’in-40, ho atividade serbisu hamoos baleta no taka estrada koak sira iha aldeia rua nian kada loron ida traballadór hetan $5.
Atividade serbisu hahú dadeer tuku 08:00 to’o 17:00 lorokraik, ne’ebé hosi atividade ne’e traballadór halo rotasaun kada semana rua no serbisu ne’e sei ramata iha novembru 2022.
Orsamentu ne’ebé aloka ba postu administrativu Uatulari hodi implementasaun PMOPA hamutuk $114.541.
Traballadór sira uza ekipamentu hanesan kanuru, gerobak, ai-suak, katana no seluk tan hodi hala’o atividade.
Jornalista : Vitorino Lopes da Costa
Editora : Julia Chatarina
