VIQUEQUE, 18 juñu 2021 (TATOLI)-Pasiente pozitivu COVID-19 na’in-ida ho inisiál MJ, tinan-28, iha Viqueque, halai sai hosi izolamentu hodi ba hasoru nia doben iha foho leten área Polo, Viqueque nian.
Pasiente ne’e, halai sai hosi izolamentu Polo Universidade Nasionál Timor Lorosa’e (UNTL), Postu Administrativu Viqueque Vila, kinta horiseik (17/06), purvolta tuku 15:00 3 Otl, hodi ba hasoru nia doben no lori halai malu to’o foho-leten.
Vise-Prezidente Sentru Integradu Jestaun Krize (CIJK) atuál diretór Saúde Munisípiu Viqueque, Francisco de Carvalho, informa pasiente pozitivu COVID-19 ne’ebé izola iha Polo UNTL, Viqueque, tenta haksoit sai tiha hosi izolamentu, nune’e pesoál saúde telefone ba Polísia Nasionál Timor-Leste (PNTL) kaptura pasiente ho nia doben.
“Pasiente ne’e tenta halai sai ba hasoru nia doben, kala nia koordena ona nia doben tanba ne’e nia halai sai. Ekipa pesoál saúde haree hetan mak ami telefone ba PNTL mai izolamentu Polo UNTL Viqueque, nune’e ami ba buka tuir,” Francisco de Carvalho haktuir ba Agência Tatoli iha edifísiu saúde munisípiu Viqueque, Boro-Matan, sesta ne’e.
Diretór saúde ne’e hatutan, oras ne’e pasiente tama fali ona izolamentu Polo UNTL no pesoál saúde no PNTL tau ona pasiente nia doben iha kuarentena rezidénsia administradór Munisípiu Viqueque hodi submete ba teste swab.
“Pasiente ho nia doben halai ne’e ba subar tiha iha foho leten, depois komunidade sira pertense iha Polo UNTL fila hosi toos mak haree hetan sira na’in-rua hodi informa ba ekipa saúde no PNTL ba kaptura sira,” nia hateten.
Jornalista : Vitorino Lopes da Costa
Editór : Francisco Simões
