DILI, 06 agostu 2020 (TATOLI)-Diretór Jerál Ensinu Pre-Eskolár, Ensinu Báziku no Rekorente, Ministériu Edukasaun Juventude no Desportu (MEJD), Apolinario Serpa Rosa, hateten ensinu pre-eskolár 22 no ensinu báziku 70 mak seidauk bele re-ativa to’o ohin loron.
Totál ensinu pre-eskolár iha territóriu Timor-Leste hamutuk 430 no ensinu báziku 1.318. Maibé husi totál ensinu pre-eskolár 430 ne’e re-ativa ona 408 no sei falta 22, ensinu báziku 1.318 re-ativa ona 1.248 no falta 70.
Notísia Relevante :RAEOA foin re-ativa eskola tolu
Nia dehan eskola hirak ne’e seidauk re-ativa tanba sei iha prosesu para kria kondisaun hanesan instalasaun tanke bee moos, garante distansiamentu sosiál no fiziku, kria fatin lixu, garante ambiente moos no seluktan ba propagasaun surtu COVID-19.
“Ho nune’e bele dehan katak husi Munisípiu 12 ne’e kuaze re-ativa hotu ona no falta de’it eskola iha RAEOA mak ninia númeru ne’e sei ki’ik liu, maibe ho rekursu ne’ebé iha garante katak ba oin eskola hotu bele re-ativa ona,” Apolinario Serpa Rosa
Notísia Relevante :Governu Garante Eskola Hotu-Hotu Tenki Re-Ativa Durante Jullu
Iha parte seluk, dadus husi Diresaun Jerál Ensinu Sekundáriu Ministériu Edukasaun Juventude no Desportu (MEJD), fó sai katak eskola sekundáriu jerál públiku no tékniku vokasionál hamutuk 161, maibé sira ne’ebé re-ativa ona ninia prosesu aprendizajen ba estudante hamutuk 156.
Husi totál eskola 161 ne’e, ensinu sekundáriu jerál iha eskola 103 no tékniku vokasionál hamutuk 58.
“Dadus totál eskola ensinu sekundáriu jerál no tékniku vokasionál 161, maibe pursentu 97 re-ativa ona, signifika falta de’it mak eskola iha RAEOA hamutuk lima hanesan Eskola Ensinu sekundáriu jerál iha tolu tékniku vokasionál rua,” relata Diretór Jéral Ensinu Sekundáriu MEJD, Deolindo da Cruz, iha Vila Verde Dili.
Notísia Relevante :Governu Re-Ativa Eskola Lima iha Munisípiu Rua Parte Leste
Entretantu, iha loron 03 fulan-juñu liubá Ministru Edukasaun Juventude no Desportu (MEJD), Armindo Maia, hateten antes fulan-jullu ramata eskola hotu-hotu tenki re-ativa ona ninia prosesu aprendizajen ba estudante sira.
Jornalista : Tomé Amado
Editór : Agapito dos Santos
