DILI, 13 Maiu 2024 (TATOLI) – Ministériu Agrikultura, Pekuária, Peska no Floresta (MAPPF) garante katak produsaun hare kulit époka dahuluk, husi Dezembru 2023 to’o Maiu 2024, sei hetan tonelada rihun 170 to’o 180.
Diretór Nasionál Ortikultura, Lúcio Ramiro Ribeiro, hateten produsaun hare kulit iha époka dahuluk ne’e sei hatudu rezultadu di’ak, tanba volume natar iha tinan ida ne’e aumenta maka’as kompara ho tinan kotuk.
Lúcio relembra katak, iha tinan kotuk, ministériu prodús de’it hare kulit tonelada rihun 92, maibé tinan ida ne’e sei hetan tonelada rihun 180, tanba nia halo ona vizita bá fatin-fatin ne’ebé agrikultór sira kuda hare kuaze natar sira hatudu progresu di’ak.
“Husi hare kulit tonelada rihun 170 to’o 180 ne’ebé ita sei prodús iha époka dahuluk ne’e kuandu konverte ba foos nia rezultadu bele sa’e entre tonelada rihun 90 no 100-resin. Kompara ho tinan kotuk ita hetan de’it foos tonelada rihun 54-resin. Rezultadu ne’e ita bele konsidera hahú di’ak uitoan no ho neineik, maibé tenke beibeik”, nia espera.
Ministériu tenta nafatin halo akompañamentu ba natar-na’in sira hodi bele konvense sira iha tinan ida ne’e halo kolleta dala rua. “Agora, rezultadu hare ba époka dahuluk nian ne’ebé komunidade agrikultór sira kuda ona, balun kolleta ona no balun sei hein prezensa Ministru Agrikultura nian atu bá lansa”, informa.
Iha ona planu MAPPF nian ba natar ektare 500 husi Baucau parte Vemasse no Bobonaro-Maliana nian maka tasak ona, no aban (14/05), Ministru Marcos da Cruz sei ba kolleta natar ektare 300 iha Baucau no 200 iha Maliana.
Serimónia kolleta hare iha natar ektare 500 ne’e simbólika de’it, tanba antes ne’e komunidade agrikultór sira iha munisípiu balun mós halo ona kolleta ne’ebé sira kuda iha époka dahuluk nian.
Husi rezultadu kona-ba produsaun hare iha tinan tomak nian ne’e sei fó sai entre Novembru no Dezembru, nune’e bele hatene iha 2024 ne’e hare kulit hira maka prodús, depois konverte ba foos karik hamutuk hira. Ministériu sei halo kompilasaun dadus hotu maka sei fó sai ba públiku.
Jornalista: Tomé Amado
Editora: Maria Auxiliadora
