OÉ-CUSSE, 17 agostu 2023 (TATOLI – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, iha konfiansa ba produtu jornalístiku atu publika atividade Governu nain maibé husu jornalista sira atu hato’o informasaun ba publiku tenke ho akurasia no kredibilidade.
Notísia relevante: Jornalista 24 tuir formasaun loron tolu hosi CITL-ABCID iha Oé-Cusse
Arsénio Paixão Bano, hato’o nia esperansa ne’e, iha serimónia atribuisaun sertifikadu ba jornalista sira na’in-26 hafoin ensera formasaun kona-bá ‘Journalism Fundamentals Training’ durante loron tolu hahú segunda 14 to’o kuarta 16 agostu 2023, iha salaun Dominikana, Oé-Cusse iha Oé-Cusse, kuarta ne’e.
“Ha’u kontente CI halo formasaun ba jornalista investigavu ho esperiénsia mai hosi ABC-ID, ne’e ha’u hanoin importante tebes, tanba saida, ami iha ne’e iha Tatoli,IP, rádiu komunidade no RTTL,EP, sei sira laiha ami laiha notísia, sei sira iha la halo nótisia ho kredibilidade rai ne’ebé de’it, iha Oé-Cusse ladi’ak hela de’it maibé iha buat barak di’ak,” nia katak.
“Buat rua ha’u hakarak husu ita-boot (jornalista) sira -nia esperiénsia ne’ebé hetan, akurasia ne’e importante tebes, maibé kontinua ho konfirmasaun, kumpre 5W+1H ne’e, tanba dala-barak ne’e, ema la konfirma ha’u, sira mesak-mesak, sira temi ha’u maibé nunka entrevista ha’u,” nia fó hanoin.
“Hanesan Oé-Cusse iha mídia tolu, rádiu komunidade, Tatoli ho RTTL sei sira laiha, ema haluha ami, mezmu ita halo sasán barak iha ne’e, maibé rai boot sei la hatene saida mak halo ona iha Oé-Cusse,” nia katak.
Arsénio Bano informa, Oé-Cusse nu’udar rai ketan ida iha Timor-Leste Indonézia haleu tanba fronteira direita ho provínsia Nusa Tenggara Timur (NTT), Indonézia, entaun Oé-Cusse sai espellu ba Indonézia.
“Entaun ita mós tenke la’o ba oin nafatin, jornalista sira apoia atu promove ida-ne’e, promove ema-ne’ebé badinas, tanba sei la badinas servisu ita la la’o ba oin,” nia katak.
Notísia relevante: Jornalista na’in-26 kompleta formasaun ho matéria prinsipál 10 iha Oé-Cusse
Jornalista: Abílio Elo Nini
Editór: Evaristo Soares Martins
