DILI, 27 agostu 2024 (TATOLI) – Ministru Justisa Sergio Hornai, dehan projetu proposta-lei liberdade relijiaun iha hela faze konsulta ho konfisaun relijioza sira.
“Bom, ha’u halo tiha ona sorumutu ho entidade sira konfisaun relijioza hanesan Igreja Katolika ninia ne’ebé ita bo’ot sira hatene maioria iha Timor-Leste. Sira fó mós sira-nia hanoin, nune’e mós ita sei halo alargamentu hodi rona liután konfisaun relijioza sira seluk”, Sergio Hornai hateten ba jornalista sira iha ni kna’ar fatin Ministériu Justisa Colmera, tersa, ohin.
Nia dehan, Vise Ministru ba Fortamesimentu Intitusionál Paulo Remédios, mós halo tán sorumutu ho reprezentante konfisaun relijoza no sosiadade sivil sira iha fulan kotuk, atu rona tán hanoin balun ba liberdade relijioza iha Timor-Leste.
“Ita hotu hatene muito bem repúblika ida-ne’e nudar Estadu ida direitu, Estadu ida demokrátiku, ita tenke pondera sasan sira ne’e hotu atu bele iha iguldade iha liberdade. Liberdade no iguladade sira ne’e tenke tuir ita-nia espiritu, tuir ita-nia filosofia, tuir ita-nia kultura timor ninian”, nia konklui.
Jornalista: Natalino Costa
Editór : Zezito Silva
