OÉ-CUSSE 02 outubru 2023 (TATOLI – Diresaun Rejionál Edukasaun Rejiaun Administrativa Espesiál Oé-Cusse Ambeno (RAEOA), kontinua implementa tán programa merenda eskolár faze daruak ba loron 40, hafoin termina faze dahuluk ba loron 52 iha fulan agostu 2023 ne’e.
Notísia relevante: RAEOA implementa ona merenda eskolár ba loron efetivu 52
Diretór Edukasaun Oé-Cusse, Daniel Mauno, Daniel Mauno esplika, antes ne’e edukasaun submete proposta orsamentu propoin kedas ba tinan tinan ida nian, hodi koloka ba nesesidade merenda eskolár nian, no implementa faze dahuluk ba loron efetivu 52 ba profesór sira atu hala’o, no remata ona iha fulan-agostu 2023 ne’e.
“Agora ita aumenta tán loron efetivu 40 atu hatutan programa merenda eskolár ne’e, tanba orsamentu ne’e aprova hotu ona ba tinan ida tomak, ne’ebé ita hatama de’it relatóriu hosi orsamentu ba implementasaun anteriór tama hotu tiha, ita levanta tán ba loron 40 tán ba faze daruak,” Daniel Mauno ba jornalista sira iha Oé-Cusse, segunda ne’e.
Tuir nia, loron 40 ne’e sei remata iha outubru to’o inísiu novembru 2023, maibé haree hosi atividade eskolár nian, karik tama ona ba feriadu, maka hafoin hapara nia implementasaun.
Tanba mekanizmu implementasaun durante ne’e iha kada eskola, kada estudante haan sentavu $0,42 tanba ne’e bazea baze legál hosi Ministériu Edukasaun.
Entretantu, alvu ba programa merenda eskolár ne’e estudante hamutuk 18.691 komposta hosi ensinu báziku17.980 no pré-eskolár 711 mai hosi pré eskolár públika 12 iha territóriu Oé-Cusse ho totál orsamentu hamutuk millaun $1-resin.
Notísia relevante: Edukasaun Oé-Cusse propoin millaun $1-resin ba programa merenda eskolár
Jornalista: Abílio Elo Nini
Editór: Evaristo Soares Martins
