DILI, 15 Jullu 2025 (TATOLI) – Períodu resesu Parlamentu Nasionál (PN) komesa iha 15 Jullu no sei tama fali iha 15 Setembru 2025, ne’ebé sei hahú ho sesaun solene.
Prezidente Parlamentu Nasionál, Maria Fernanda Lay, dehan durante resesu ne’e sei iha Komisaun Permanente hodi kontinua serbisu atu garante nafatin funsionamentu órgaun lejizlativu ne’e.
“Bankada parlamentár sira designa ona nia membru iha Komisaun Permanente. Iha deputadu na’in-16, aumenta tan ho meza Parlamentu Nasionál iha na’in-tolu”, Maria Fernanda Lay informa hafoin reuniaun líder bankada, ohin.
Nia dehan sei iha reuniaun dahuluk Komisaun Permanente hodi hili sekretária ida ba komisaun ne’e, enkuantu Prezidente no Vise mantein meza PN atuál.
Tuir Konstituisaun iha artigu 102 kona-ba Komisaun Permanente, sira sei halo serbisu nafatin iha períodu ne’ebé Parlamentu Nasionál para hela, iha intervalu ba sesaun no mós iha kazu seluk-seluk previstu iha konstituisaun.
Kompete ba Komisaun Permanente mak akompaña serbisu sira Governu nian no mós administrasaun nian. Koordena serbisu sira komisaun nasionál nian, promove konvokasaun Parlamentu Nasionál, prepara no organiza Parlamentu Nasionál nia sesaun sira.
Aleinde ne’e, autoriza dezlokasaun Prezidente Repúblika iha rai-laran, dirije Parlamentu Nasionál nia relasaun ho Parlamentu no instituisaun análoga sira iha rai seluk no autoriza deklarasaun Estadu serku nian no Estadu emerjénsia nian.
Tuir Konstituisaun iha artigu 99, lejizlatura kompriende sesaun lejizlativu lima no sesaun lejizlativu idaidak iha durasaun tinan ida nian. Períodu normál funsionamentu Parlamentu Nasionál, rejimentu mak define.
Iha rejimentu PN iha artigu 45 (Sesaun lejizlativa), períodu normál funsionamentu Parlamentu nian hahú iha 15 setembru no remata iha 15 Jullu. Tanba ne’e, PN iha lejizlatura daneen ne’e kompleta ona sesaun lejizlativa dahuluk no sesaun daruak sei ramata iha 15 Jullu.
Lembra katak Parlamentu realiza ona, iha 08 Jullu, reuniaun plenária ikus ba sesaun lejizlativa daruak nian.
Notísia relevante: Parlamentu Nasionál hahú tama resesu
Jornalista: Nelson de Sousa
Editora: Maria Auxiliadora
