DILI, 23 Jullu 2025 (TATOLI)–– Torneiu xadrez klásiku (padraun) mane ba ronda datoluk iha Jogu Desportivu CPLP XII ne’ebé halao iha Sentru Konvensaun Dili (CCD), Portugal, Angola, no Cabo Verde hotu-hotu hetan pontu, enkuantu Mosambike la konsege marka pontu husi nia Atleta.
Ronda datoluk, ne’ebé hahú iha tuku 09:10 dadeer Oras Timor-Leste, partisipa hosi nasaun membru CPLP neen: Portugál, Angola, Cabo Verde, Timor-Leste, São Tomé e Prínsipe, no Mosambike.
Portugál halakon São Tomé e Prínsipe no remata jogu iha tuku 09:20 dadeer OTL, Angola mós asegura vitória ida hasoru Mosambike no remata iha tuku 10:05 dadeer OTL.
Entretantu, Cabo Verde halakon uma-na’in Timor-Leste iha jogu ne’ebé dura to’o tuku 11:38 dadeer OTL.
Ho rezultadu ne’e signifika Portugál, Angola, no Cabo Verde ida-idak hetan pontu ida iha ronde datoluk. Entretantu, Mosambike seidauk hetan pontu ida dezde inísiu torneiu nian.
Jogu sei kontinua iha loron 24 fulan-Jullu tinan 2025, to’o ba ronde dalimak hodi determina manan-na’in.
Klasifikasaun jerál pontu sira iha kategoria Xadrez Klásiku Mane nian maka :
- Portugál pontu 3
- Angola pontu 2
- Cabo Verde pontu 2,5
- Timor-Leste pontu 1
- São Tomé e Prínsipe pontu 0,5
- Mosambike pontu 0.
Antes ne’e, iha ronda dahuluk, ne’ebé akontese iha loron 21 Jullu 2025, Portugal, Angola, no Cabo Verde ida-idak hetan pontu ida. Iha ronda daruak iha loron 22 Jullu 2025, Portugál no Timor-Leste rejista vitória, enkuantu Cabo Verde no São Tomé e Prínsipe empata ho pontu 0,5 ba nasaun ida-idak.
Jogadór na’in-neen hosi nasaun ida-idak partisipa iha torneiu ne’e mak hanesan :
- Rivanho Viegas (Timor-Leste) – Klasifikasaun Padraun 1655
- Denilson Felipe Simbine (Mosambike) – Laiha Klasifikasaun
- Matviy Faryma (Portugal) – Klasifikasaun Padraun 2230
- Célio Alexandre David Tchilulu (Angola) – Klasifikasaun Padraun 1750
- Celton Manuel Sousa Ramos (Cabo Verde) – Laiha Klasifikasaun
- Daniel da Costa Fernandes Ramos (São Tomé e Príncipe) – La iha Klasifikasaun
Torneiu Xadrez XII CPLP 2025 fahe ba kategoria tolu : klásiku (padraun), rápidu, no blitz. Torneiu ne’e hala’o iha loron 21 to’o 25 fulan-jullu tinan 2025, ho árbitru lokál na’in sia hosi Timor-Leste no árbitru internasionál na’in haat hosi Portugal, São Tomé e Prínsipe, no Cabo Verde.
Ho entuziazmu hosi partisipante sira, torneiu ne’e manas liután bainhira ronde sira la’o. Ema barak tau atensaun ba Portugál, ne’ebé agora daudaun lidera klasifikasaun, enkuantu Mosambike buka atu rekupera no reklama nia pontu dahuluk sira iha ronda tuirmai.
Jornalista : Cidalia Fátima
Editora : Armandina Moniz
