BAUCAU, 27 janeiru 2023 (TATOLI) – Dirijente Ensinu Báziku Filiál (EBF) Daitula, aldeia Maucale, suku Gariuai, postu administrativu Baucau Vila, deside la reabilita sala aula tolu liuhosi Programa Konstrusaun no Reabilitasuan Eskolár (PKRE) tanba kondisaun grave liu.
Koordenadora EBF primeiru no segundu siklu Daitula, Ana Cesaltina Belo, esplika, kondisaun edifísiu eskola refere iha sala tolu hetan estragu tanba konstrui iha tempu okupasaun Indonézia nune’e parte eskola deside la utiliza ba prosesu aprendizajen tanba kestaun estudante sira-nia vida.
Koordenadora ne’e deside la reabilita sala aula tolu ne’e tanba kondisaun aat no reabilita de’it sala sia hosi totál sala 12 iha edifísiu haat.
“Edifísiu aat tanba konstrusaun tempu Indonézia nune’e ami hakarak asegura estudante tanba ta’uk anin-boot,” Koordenadora EBF Daitula Maucale hateten iha aldeia Maucale, sesta ne’e.
Maibé dirijente EBF Daitula agradese ba governu tanba tulun reabilita ona sala sia hodi rezolve difikuldade kona-bá menus sala aula nune’e kontinua husu atu futuru konstrui no hadi’a tán sala aula tolu ne’ebé aat.
Purtantu, Primeiru Ministru (PM), Taur Matan Ruak, halo inaugurasaun ba EBF Daitula ne’e komposta hosi edifísiu ida ho sala aula tolu no sala profesór ida ho orsamentu $83.515,23 no simbolikamente entrega mós kadeira no meza hodi fasilita prosesu aprendijazen iha eskola refere.
Antes ne’e, eskola refere iha edifísiu tolu maibé inísiu tinan 2023 aumenta tán edifísiu ida, komposta hosi sala aula tolu no eskritóriu profesór ida no aloka liuhosi Ministériu Edukasaun, Juventude no Desportu (MEJD) liuhosi Programa Konstrusaun no Reabilitasuan Eskolár (PKRE) ho totál orsamentu $83.515,23.
EBF rejista estudante primeiru no segundu siklu hamutuk 145, hosi totál profesór na’in-10 komposa bosi permanente neen, kontratadu rua no parsiál rua.
Notísia relevante: PM Taur inaugura PKRE iha EBF Daitula Maucale Gariuai
Jornalista : Natalino Belo
Editór : Evaristo Soares Martins
