DILI, 23 fevereiru 2023 (TATOLI) – Pulmonolojista iha Hospitál Nasionál Guido Valadares (HNGV ), Neusa Lopes, dehan Saudozu Sebastião Gomes nia aman, Afonso Gomes ne’ebé antes ne’e baixa iha izolamentu ospitalár, nia kondisaun hahú di’ak ona.
“Pasiente ne’e moras pulmaun krónika, entaun ita halo tratamentu iha izolamentu HNGV, depois ita fó atendimentu ne’ebé di’ak ba pasiente, nia kodisaun komesa di’ak ona. semana rua ba kotuk pasiente nia isin bubu hotu, problema infesaun krónika, má nutrisaun grave no anemia”, Neusa Lopes, dehan ba jornalista sira iha HNGV, ohin.
Nia informa, jeralmente pasiente nia kondisaun di’ak, ran komesa iha ona no isin komesa sa’e, nia infesaun komesa tun, nia mós bele mobilizasaun oituan ba mai iha ne’e.
“Ita mós haree ba nia idade ne’ebé mak iha maibé kodisaun agora daudaun rasik di’ak hela”, Neusa dehan.
Nia rekorda, pasiente Afonso Gomes bainhira hala’o transferénsia husi ospitál Viqueque mai iha HNGV hodi baixa iha sala VIP, depois médiku sira halo ezaminasaun liuhosi raiu-x katak nia pulamun halai liu ba krónika, bé mós iha tan pulamaun sorin, husi ne’e médiku sira halo ezaminasaun katak iha batéria ne’ebé iha presiza trata ho aimoruk antibiotiku.
Kona-ba planu atu halo transferénsia ba rai liur, nia dehan pasiente nia moras ne’e bele halo tratamentu iha ne’e tanba HNGV iha ona medikamentu ba moras ne’e.
“Ita halo tratamentu iha ne’e hanesan mós rai liur tanba medikamentu ne’ebé fó ne’e hanesan hela no depois pasiente ne’e sofre infesaun krónika no risku atu sae aviaun tanba transmisaun infesaun, entaun médiku sira prefere bele halo tratamentu iha ne’e”. nia konklui.
Notísia relevante : Saudozu Sebastião Gomes nia aman iha internamentu ospitalár
Jornalista : Felicidade Ximenes
Editór : Zezito Silva
