AINARO, 11 Maiu 2023 (TATOLI) – Servisu Rejistu no Verifikasaun Emprezariál, Institutu Públiku (SERVE, I.P), Sukursál munisípiu Ainaro, rekolla entre 2020 no 2022, reseita hamutuk $ 4,340 ba kofre Estadu.
Koordenadór Sukursál SERVE, I.P munisípiu Ainaro, Anselmo dos Reis Araújo, hateten, fonte reseita hirak-ne’e liuhosi rejistu atividade emprezariál hamutuk 800 no kontibui ona emolumentu $ 4,340 ba kofre Estadu.
Tuir Anselmo Araújo, iha maiu 2020, estabelese sukursál iha Ainaro, maibé lahalo rejistu no hahú rejistu atividade emprezariál iha jullu.
Husi períodu ne’e, númeru rejistu komersiál barak liu maka emprezáriu ne’ebé hala’o negósiu ho tipu ki’ik kompara ho empreza ne’ebé hala’o atividade negósiu ho eskala bo’ot.
“Hahú husi Jullu 2020 to’o 2022, totál emolumentu ne’ebé ita aplika ba empreza bainhira halo renovasaun dokumentu no rejistu komersiál hamutuk $4,340, husi ne’e 2020, rekolla $446, enkuantu $1,477 iha 2021 no iha 2022, arekada $2,417”, informa Anselmo Araújo ba Tatoli iha Ainaro Vila, kinta ne’e.
Dirijente ne’e esplika katak empreza ne’ebé rejista atividade komersiál hodi hetan lisensa depende ba kategoria.
“Sira ne’ebé laselu emolumentu ho kategoria risku ki’ik hanesan faan nesesidade bázika, modo no roupa obralan, no ita aplika emolumentu ba empreza sira ne’ebé loke restaurante, ofisina, turizmu no penginapan [alojamentu], tanba presiza hetan rekomendasaun husi ministériu relevante antes SERVE emite lisensa”, nia esklarese.
Nia dehan, bainhira empreza ki’ik atu renova fali lisensa atividade komersíal, SERVE sei aplika pagamentu administrativu.
“Emisaun sertifikadu ka sertidaun lisensa ne’e gratuita, maibé bainhira expira ona no mai halo renovasaun sei selu emolumentu $10 kada tinan”, nia haktuir.
Notísia relevante: Janeiru-fevereiru 2023, SERVE, I.P rejistu kompañia 791
Jornalista: Afonso do Rosário
Editora: Isaura Lemos de Deus
