DILI, 14 marsu 2023 (TATOLI)— Diretór Ezekutivu Servisu Rejistu no Verifikasaun Emprezariál, Institutu Públiku (SERVE,I.P), Florêncio da Costa Sanches, hateten, hahu hosi janeiru to’o fevereiru 2023 SERVE,I.P rejistu kompañia hamutuk 791.
“Iha tinan 2023 hahú hosi janeiru to’o fevereiru, ita rejistu kompañia hamutuk 791. Hosi númeru ne’e, kompañia internasionál rasik hamutuk 42, no restu ne’e kompañia nasionál,” Florêncio da Costa Sanches dehan ba Agência Tatoli, iha nia knaar-fatin, Hudi-Laran, Dili, tersa ne’e.
Nia dehan, kompañia 791 ne’ebé foin rejistu iha SERVE,I.P seidauk iha reseita ba Estadu. Tanba tuir dekretu lei númeru 16/2017, hateten, kompañia sira selu taxa ba Estadu hafoin rejistu tiha hala’o atividade tinan ida hetan rendimentu mak foin bele selu taxa ba Estadu.
“Ha’u hanoin kompañia nasionál no internasionál ne’ebé kontinua mai halo rejistu iha SERVE,I.P ida ne’e, vantajen boot ba Timor-Leste. Ita agora atu tama ba organizasaun boot rua mak ASEAN no Organizasaun Mundiál Komérsiu (OMK). Ho ida ne’e, númeru empreza tenke boot atu sira kontribui liuhosi halo produsaun bens ruma asesu ba iha adezaun ne’e,” nia dehan.
Nia dehan, dadus empreza ne’ebé SERVE,I.P rejistu iha tinan 2022 hamutuk 5.466. Hosi númeru ne’e kompañia internasionál hamutuk 124 restu nasionál, ho nia totál reseita hamutuk milliaun $175.
“SERVE,I.P nia tarjetu tinan lima oin mai ita tenke atinje 100.000 empreza iha territóriu laran. Maibé ita agora foin iha empreza 42.079. Ne’e konta hahú hosi tinan 2013 to’o 2023. Ita hakarak empreza to’o 100.000 ho objetivu balu tenke ba iha área sira hanesan indústria, turizmu, agrikultura no seluk tan,” Florêncio hateten.
Diretór Ezekutivu SERVE,I.P ne’e, hateten, sira-nia parte hakarak empreza iha Timor-Leste (TL) ho númeru barak tanba Xina no Índia husu tiha ona bens sasán mai TL hamutuk 15.000 produtu. Maibé TL foin iha produtu tolu mak, kafé, kami no besi tua sira.
“Nune’e husu ba emprezáriu sira hakbesik an ba Governu atu hetan apoiu finanseiru, tanba daudaun ne’e Governu iha polítiku tau osan iha banku atu fasilita imi,” nia dehan.
Nia afirma, kompañia internasionál no nasionál ne’ebé rejistu iha SERVE,I.P, ba internasionál ba área sira hanesan, Aero no konsultoria. No ba nasionál sira mak hanesan, turizmu, agrikultura no Peska.
“Ita halo komparasaun ba tinan tolu kotuk. Agora área turizmu no agrikultura la’o kapás loos ona maibé ha’u husu ba maluk sira tenke hakat mós ba área indústria. Tanba área indústria ne’e bainhira ita investe bele fó servisu barak ba timor-oan sira,” nia hateten.
Jornalista : Arminda Fonseca
Editora : Armandina Moniz
