VIKEKE, 29 Dezembru 2025 (TATOLI)—Diretór Servisu Rekursu Umanu Munisipál Vikeke, Luís Amaral informa Servisu Rekursu Umanu Vikeke rejista ona funsionáriu rejime jerál nian hamutuk na’in-13 tama idade reforma iha tinan 2026.
“Ami simu ona lista husi nasionál funsionáriu hamutuk na’in-13 tama iha reforma. Funsionáriu sira-ne’e daudaun ne’e hala’o servisu iha repartisaun Autoridade Munisípiu Vikeke, Servisu Agrikultura Munisípiu no Servisu Edukasaun,” Luís Amaral ba TATOLI iha ninia kna’ar fatin, Segunda ne’e.
Diretór ne’e esplika funsionáriu sira-ne’e ho idade 65 bá leten ona, ne’ebé automatikamente bá reforma.
“Funsionáriu sira-ne’e bainhira bá reforma ita-nia forsa traballu sei menus no sei difikulta servisu. Ita presiza halo rekrutamentu hodi substitui funsionáriu reformadu sira,” nia esklarese.
Notísia relevante: Tinan oin KFP implementa reforma obrigatóriu ba funsionáriu
Nia hatutan funsionáriu idade reforma balun agora asumi hela kargu xefia, depende ba Autoridade Munisípiu Vikeke halo karta pedidu ba Komisaun Funsaun Públika (KFP). Se karta la bá, automatika para servisu.
Funsionáriu ne’ebé tama ba idade reforma hamutuk na’in-13 kompostu husi Sekretariadu Munisipál na’in-lima (5), Servisu Agrikultura na’in-lima (5), Saúde na’in-ida (1), Servisu Edukasuan na’in-ida (1) no Servisu Munisipál Agua no Saneamentu (SMASA) na’in-ida (1).
Enkuantu, tuir dadus, funsionáriu iha Munisípiu Vikeke hamutuk na’in-624 ne’ebé kompostu husi feto na’in-133 no mane hamutuk na’in-491.
Jornalista: Vitorino Lopes da Costa
Editór: Xisto Freitas da Piedade
