DILI, 08 dezembru (TATOLI) – Institutu Públiku (IP) rua kompostu hosi Agência Noticiosa de Timor-Leste no Arkivu Muzeu Rezisténsia Timorense, tersa ne’e selebra nota entendimentu kona-ba divulgasaun informasaun.
Papél hosi TATOLI – Agência Noticiosa de Timor-Leste, I.P ho objetivu prinsipál kria fonte informasaun ne’ebé ofisiál, ho produsaun notísia ba públiku ho eskala nasionál, rejionál no internasionál.
Nune’e mós nu’udar kanál informativu Governu nian ne’ebé fornese informasaun kredível no verdadeira ba povu. TATOLI ezerse atividade sub tutela no superintendénsia ba membru Governu ne’ebé responsável iha área komunikasaun sosiál. (Decreto-Lei N.º 21 /2017 de 24 de maio).
Nune’e mós papél hosi AMRT ho misaun prinsipál prezerva, valoriza no divulga memória resisténsia no kultura povu timorense nian. Atu kumprimenta misaun ne’e, AMRT dezenvolve atividade konservasaun, organizasaun no disponibilizasaun respetivu fundu dokumentál. Nune’e mós organiza no promove inisiativa divulgasaun públika no apoia atividade ne’ebé kontribui ba valorizasaun memória resisténsia nasionál. (Artigo 1º do Anexo, Estatuto, do Decreto-Lei nº 22/2014, de 3 de setembro).
Prezidente TATOLI, I.P, Manuel Pinto, esplika, institusaun públiku rua selebra nota entendimentu ne’e ligada ba divulgasaun informasaun.
“Nota Entendimentu ne’e ho objetivu partisipál iha divulga informasaun ba atividade tomak ne’ebé maka AMRT halo iha kontestu misaun no vizaun AMRT ninian ba prezervasaun istória buka-tuir fatin sira, nune’e TATOLI iha responsablidade atu divulga informasaun ne’e ba públiku atu akompaña,” Prezidente TATOLI IP Manuel Pinto, ko’alia iha ámbitu serimónia asina nota entedimentu ho AMRT, iha Caicoli, tersa ne’e.
Nune’e mós objetivu hosi nota entendimentu maka tuir dekrtu -lei númeiru 21 /2017 atribui ba TATOLI iha kompeténsia prezerva dokumentu Estadu nian liuhosi tipu foto, audio no testu.
“Oinsá ita ho meiu sira-ne’e iha futuru tanba ida-ne’e maka ami realiza nota entedimentu,” Prezidente TATOLI, Manuel Pinto subliña.
Prezidente TATOLI IP ne’e mós agradese ba AMRT tanba hatudu ona vontade no prontidaun bele realiza ona nota entendimentu ne’e.
Entretantu, Diretór Ezekutivu AMRT, Hamar Antoninho Baptista Alves, agradese ba kooperasaun ne’ebé TATOLI no AMRT selebra ona.
“Objetivu hosi MOU n’ee rasik atu ajuda AMRT hodi garantia sensibilizasaun ba ita-nia dokumentáriu istóriku rezisténsia Timor-Leste nian”, nia katak.
Jornalista : Natalino Costa
Editór : Evaristo Soares Martins
