DILI, 08 Abríl 2026 (TATOLI)—Ekipa Vietname dasa Timor-Leste 7-1 iha jogu ASEAN Futsal Championship 2026 ne’ebé eraliza iha Tailándia.
Notísia Relevante: Ekipa selesaun Nasionál Futsál dezloka bá Tailandia
Ekipa Lafaek Timor-Leste la konsege konkista nia vitória iha jogu daruak ASEAN Futsál Championship bainhira kontra Vietname.
Iha jogu dahuluk, Timor-Leste luta kontra nia adversáriu Tailándia ne’ebé hanesan uma-na’in, maibé la konsege konkista nia vitória no to’o ikus Timor-Leste lakon 1-4.
Husi derrota ba daruak tutuir malu ne’e lori Timor-Leste okupa iha pozisaun ikus liu iha grupu A.
Ekipa ne’ebé okupa pozisaun dahuluk mak Vietname ho pontu neen (6) ho totál golu 11, iha pozisaun daruak okupa husi Tailándia ho pontu neen (6) ho golu neen (6), Myanmar okupa iha pozisaun datoluk ho pontu zero no sofre golu neen (6), enkuantu Timor-Leste iha pozisaun ida ikus liu (okos liu) ho ppntu zero no sofre golu 11.
Tanba ne’e, daudaun ne’e ekipa Timor-Leste hela de’it jogu ida kontra Myanmar hodi kompleta jogu no signifika katak ekipa Timor-Leste sei labele ona avansa ba faze kuartu finál.
Notísia Relevante: Jogadór Selesaun Nasionál na’in-14 preparadu kompete iha ASEAN Futsal Championship
Jornalista : Hortêncio Sanchez
Editór : Cancio Xiemenes
