DILI, 04 Fevereiru 2026 (TATOLI)—Sekretáriu Estadu Formasaun Profisionál no Empregu (SEFOPE), Rogério Araújo Mendonça, informa tuir Governu Nova Zelandia nia alvu ba prosesu rekrutamentu traballadór sira liuhusi programa Empregadór Seasonál Rekoñesidu (RSE), ne’e hamutuk 25.000.
Notísia Relevante: SEFOPE haruka traballadór timoroan na’in-10 ba servisu iha Nova Zelándia
“Tuir alvu rekrutamentu traballadór timoroan mak Governu Nova Zelándia sujere mak hamutuk 25.000, entaun ita foin hahú iha pilotu dahuluk nian ne’ebé identifika traballadór na’in-10 mak sei ba servisu iha Nova Zelándia,” Sekretáriu Estadu Formasaun Profisionál no Empregu (SEFOPE), Rogério Araújo Mendonça, informa ba jornalista sira iha salaun City-8, Manleuana, ohin.
Maibé, nia esplika, alvu ne’ebé iha ne’e la’ós de’it ba Timor-Leste maibé ne’e fó biban mós ba nasaun seluk iha Ázia Pásifika.
Tanba ne’e, Governu liuhusi SEFOPE sei kontinua esforsu hodi halo rekrutamentu ba joven timoroan sira-ne’ebé iha abilidade ba programa refere, tanba iha prosesu rekrutamentu tuir mai sei hahú fali iha fulan-Marsu to’o Setembru.
“Ha’u husu ba joven sira prepara-an didi’ak atu bele kompete hotu iha oportunidade ida-ne’e hodi hadi’a ida-idak nia moris iha família no fó kontribuisaun returnu ba Estadu,” nia dehan.
Jornalista : Alexandra da Costa
Editór : Cancio Ximenes
